Японияликлар эҳтимолий урушдан хавотирда. Мамлакатда намойишлар авж олди

Японияда Бош вазир Санаэ Такаичининг мудофаа сиёсатини кучайтиришга қаратилган қадамлари ортидан сўнгги ўн йилликлардаги энг йирик урушга қарши намойишлар авж олди. Бу ҳақда BBC хабар берди.

Токио ва бошқа йирик шаҳарларда минглаб одамлар кўчаларга чиқиб, “No War” шиорлари билан ҳукумат сиёсатидан норозилик билдирмоқда. 2025 йил октябрда ҳокимиятга келган Такаичи Япониянинг Иккинчи жаҳон уруши ортидан шаклланган пацифистик сиёсатидан чекинишга қаратилган бир қатор қарорларни қабул қилди. Хусусан, қурол экспорт қилиш бўйича узоқ йиллик тақиқ юмшатилди ва мамлакат армиясининг хориждаги роли кенгайтирилди.

Ҳукумат бу чораларни минтақада хавфсизлик таҳдидлари ортиб бораётгани билан изоҳлаган. Расмий Токио Хитойнинг фаол сиёсати, Шимолий Кореянинг ноаниқ хатти-ҳаракатлари ва Россия билан яқинликни асосий хавф омиллари сифатида кўрсатган. Шунингдек, АҚШ ҳам Японияни хавфсизлик соҳасида фаолроқ бўлишга бир неча бор ундаган. Бироқ мамлакат ичида бу қарорларга қарши кайфият тобора кучайиб, фуқаролар Япония ўзининг урушдан кейинги тинчликпарвар йўлини йўқотаётганидан хавотирланиш бошланган.

Нашрга кўра, Токио марказидаги намойишларда ёшлар ҳам фаол қатнашмоқда. Намойишчилардан бири, 30 ёшлардаги Акари Маэзоно ҳукумат жамоатчилик фикрини инобатга олмаётганини айтган.

“Бу каби ўзгаришлар халқ фикри тингланмасдан амалга оширилаётганидан ғазабдаман”, деган у.

Намойишларда қатнашган бошқа бир кекса фуқаро эса Япония конституциясининг 9-моддасини ҳар қандай ҳолатда сақлаб қолиш лозимлигини таъкидлаган.

“Айнан шу модда Японияни аввалги можаролардан четда ушлаб турди. Агар у бўлмаганида, мамлакат аллақачон урушга тортилиб кетган бўларди”, деган у.

Маълумот учун, Япония конституциясининг 9-моддаси 1947 йилда қабул қилинган бўлиб, унда мамлакат урушдан воз кечиши ва ҳужумкор армия сақламаслиги белгиланган. Кейинчалик эса бу модда қайта талқин қилиниб, “ўзини ҳимоя қилиш кучлари”га рухсат берилган.

Намойишлар Токиодан ташқари Осака, Киото ва Фукуока шаҳарларида ҳам фаоллашган. Ижтимоий тармоқлардаги чақириқлар ортидан иштирокчилар сони ҳафта сайин ошиб бормоқда.

Ойбек Рустамов