Япония АҚШга ярим трлн доллар беради – Трамп (видео)

Токио АҚШ иқтисодиёти учун 550 миллиард доллар сармоя киритади. Бу ҳақда АҚШ Президенти Дональд Трамп ўзининг Truth Social саҳифасида ёзиб қолдирди.

Оқ уй раҳбарининг сўзларига кўра, мамлакатлар ўртасида бундай битим аввал ҳеч қачон бўлмаган ва бу орқали юз минглаб иш ўринлари яратилиши мумкин. 

“Биз Япония билан йирик шартномани якунладик, эҳтимол бу тарихдаги энг катта битимдир. Япония менинг кўрсатмам билан Қўшма Штатларга 550 миллиард доллар сармоя киритади, АҚШ ушбу битимдан фойданинг 90 фоизини олади. Бунақаси ҳали бўлмаган”, дея ёзган Америка Президенти. 

Шунингдек, у келишув доирасида Япония АҚШга 15 фоизлик бож тўлашга ваъда берганини қўшимча қилган.

“Энг муҳими шуки, Япония ўз бозорини АҚШ савдоси учун очади, жумладан, автомобиллар, юк машиналари, гуруч ва айрим бошқа қишлоқ хўжалиги маҳсулотлари бўйича. Япония АҚШга 15 фоизлик ўзаро тарифлар тўлайди. Бу Қўшма Штатлар учун ниҳоятда қувончли давр, айниқса Япония билан доимий равишда яхши муносабатларга эга бўлишимиз нуқтаи назаридан”, деган Трамп. 

Эслатиб ўтамиз, аввалроқ Дональд Трамп Бирлашган Араб Амирликлари (БАА) ўн йил ичида АҚШга 1,4 триллион доллар сармоя киритишини айтганди. Трамп бу сармояларнинг сунъий интеллект ва компьютер фанлари соҳаларини ривожлантиришга хизмат қилишини қайд этган.

Маржона Муродова