Япония ҳукумати истеъфога чиқди

Япония Бош вазири Сигэру Исиба бошчилигидаги ҳукумат янги бош вазир сайловлари олдидан тўлиқ таркибда истеъфога чиқди. Бу ҳақда NHK хабар берди.

Бугун, 21 октябрь куни парламентнинг қуйи палатасида сайловлар бўлиб ўтади. Овоз беришдан бир кун олдин Япония Либерал-демократик партияси (ЛДП) ва “Япония янгиланиш жамияти” янги коалиция тузишга келишиб олган.

Бу қадам парламентда ЛДП етакчиси Санаэ Такаитини сайлаш учун зарур бўлган кўпчиликнинг овозини таъминлади. У шунингдек, Японияда бу лавозимни эгаллаган илк аёл бўлиши мумкин.

Шундан сўнг, Япония Либерал-демократик партияси ўзининг янги раиси сифатида 64 ёшли Санаэ Такаитини танлади. У Конституцияни қайта кўриб чиқиш ва армияни мустаҳкамлаш тарафдори ҳисобланади.

Такаити Кобе университети ва Матсушита давлат бошқаруви ва менежмент институти битирувчиси. 1987 йилда грант ютиб, АҚШга кўчиб ўтган. 1989 йилда Японияга қайтиб келган ва 1993 йилда илк бор Япония парламентининг қуйи палатасига сайланган.

Такаити ўзининг биринчи вазирлик лавозимини 2006 йилда олган. Уни бир вақтнинг ўзида бир нечта лавозимларга тайинлашган – Илмий-техник сиёсат вазири, Инновациялар вазири, Ёшлар ва гендер тенглиги масалалари бўйича вазир, Озиқ-овқат хавфсизлиги вазири. 

Такаитининг номзоди илгари сурилгач, Японияда ҳукмрон коалиция парчаланиб кетган. 

Эслатиб ўтамиз, аввалроқ Япония Бош вазири ва Либерал-демократик партия етакчиси Сигэру Исиба истеъфога чиқишини эълон қилганди.