Янги евро қандай кўринишда бўлади? 10 та вариант тақдим этилди (видео)

Европа Марказий банки (ЕМБ) янгиланган евро банкноталарининг ўнта якуний лойиҳасини тақдим этди ва Европа Иттифоқи мамлакатлари аҳолисига ўзларига маъқул келган дизайнни танлашни таклиф қилди. Бу ҳақда “Euronews” хабар берди.

Қайд этилишича, янги купюралар янада замонавийроқ, хавфсизроқ ва осон таниладиган бўлиши керак. Уларнинг муомалага чиқарилиши эса тайёргарликнинг барча босқичлари якунланганидан кейин амалга оширилиши кутилмоқда.

Таклиф этилган 1200 та концепция орасидан экспертлар “Европа маданияти” ва “Европа табиати” номли иккита мавзудаги серияга бўлинган ўнта эскизни танлаб олган.

ЕМБ раиси Кристин Лагард Европа аҳолисини регулятор сайтида эълон қилинган онлайн овоз бериш жараёнида иштирок этишга чақирган. Ҳар бир мавзу учун минималистик услубдан тортиб, бадиий жиҳатдан мураккаброқ ечимларгача бўлган бештадан вариант тайёрланган. Жамоатчилик сўровномаси якунлари бўлажак банкноталарнинг якуний дизайнини аниқлашга ёрдам беради.

Агар маданиятга бағишланган концепция ғалаба қозонса, купюраларда Европанинг таниқли санъат, фан ва адабиёт арбоблари пайдо бўлади.

Қуйидагиларни жойлаштириш таклиф этилмоқда:

• 5 евролик банкнотада – опера хонандаси Мария Каллас;
• 10 еврода – бастакор Людвиг ван Бетховен;
• 20 еврода – олим ва Нобель мукофоти лауреати Мария Кюри;
• 50 еврода – ёзувчи Мигель де Сервантес;
• 100 еврода – Леонардо да Винчи;
• 200 еврода – Нобель тинчлик мукофоти лауреати Берта фон Зуттнер.

Иккинчи серия Европа табиатига бағишланган. Ҳар бир банкнотанинг олди томонида дарёлар ва табиий ландшафтлар фонида қушларнинг ҳар хил турлари, орқа томонида эса Европа Иттифоқининг энг муҳим институтлари бинолари тасвирланган.

Жамоатчилик овози якунлангач, ЕМБ ғолиб концепцияни аниқлайди ва янги банкноталарни чиқаришнинг техник тайёргарлигига киришади. Регулятор режаларига кўра, янгиланган купюралар барча ишлаб чиқариш жараёнлари якунланганидан сўнг босқичма-босқич муомалага киритила бошлайди.

Эслатиб ўтамиз, аввалроқ Тожикистонда 2025 йилда муомалага чиқарилган 100 сомоний номиналдаги банкнота нуфузли “Йил банкнотаси” танловида иштирок этиб, дунёнинг энг яхши пул белгилари рўйхатидан жой олганди.