Янги фактлар очилди: Эпштейннинг ўзбекистонлик қурбони баёнот берди

Марҳум молиячи Жеффри Эпштейннинг жиноятларидан омон қолган ва Роза исми остида сўзга чиққан ўзбекистонлик қурбон илк бор АҚШ Конгрессидаги тингловларда молиячи уй қамоғи даврида содир этган зўрлашлар ҳақида оммавий равишда сўзлаб берди. Вакиллар палатасининг Назорат қўмитасидаги демократлар ушбу тадбирни Флорида штатининг Уэст-Палм-Бич шаҳрида ўтказган. Унинг нутқи ҳақида Америка ОАВлари хабар берди. 

Розанинг айтишича, у 2008 йилда 18 ёшида моделлар бўйича агент Жан-Люк Брюнель билан танишган. Брюнель унга моделлик карьерасини ваъда қилган ва кейинроқ Эпштейн билан таништирган. Аёл 2009 йилда, АҚШда бўлиб турган вақтида молиячи уй қамоғини ўтаётган Уэст-Палм-Бичдаги уйида у билан учрашган.

Тингловларда Роза Эпштейн унга иш таклиф қилганини, сўнгра зўравонлик қила бошлаганини айтган. Жабрланувчининг сўзларига кўра, бу ҳолат уч йил давом этган.

Аввалроқ, Жеффри Эпштейндан жабр кўрган 11 кишининг манфаатларини ҳимоя қилувчи адвокат Арик Фудали АҚШ Адлия вазирлиги Эпштейн томонидан жинсий эксплуатация қилинган ўзбекистонлик аёлнинг шахсини очиқлаб қўйганини маълум қилган. Унинг сўзларига кўра, “Эпштейн файллари”да аёлнинг исми 538 марта тилга олинган – “бу хатоларнинг ҳаддан ташқари кўплигидан далолат”. Фудали ўз фирмаси жабрланувчининг исмини Адлия вазирлигига олдиндан тақдим этганини таъкидламоқда.

Розанинг сўзларига кўра, 2009 йил май ойига келиб у Нью-Йоркда виза билан бўлган, июль ойида эса Эпштейн уй қамоғида бўлган вақтда унинг Уэст-Палм-Бичдаги уйида учрашган. Кейинчалик Эпштейн унга ўзининг Florida Science Foundation ташкилотида иш таклиф қилган. Бу ташкилот Эпштейнга 2008 йилдаги ҳукмдан сўнг, дастлабки келишувга кўра, ҳафтасига олти кун, кунига 16 соатгача ҳибсхонани тарк этишга рухсат берилган доирада ишлаши учун хизмат қилган.

“Бир куни унинг массажчиси мени Эпштейннинг хонасига чақирди ва у ерда биринчи марта Жеффри томонидан шилқимликка дуч келдим. Кейинги уч йил давомида мен тизимли равишда зўрлаб келиндим”, дейди Роза тингловда.

Шунингдек, у АҚШ Адлия вазирлиги (DOJ) томонидан эълон қилинган Эпштейн иши бўйича материалларда унинг исми тасодифан очиқланганидан кейин такрорий руҳий жароҳатни бошдан кечирганини айтган.

“Бой ва қудратли шахслар ҳужжатларни таҳрир қилиш (яшириш) орқали ҳимояланган бир пайтда, менинг исмим очиқ қолди. Энди менга бутун дунёдан журналистлар қўнғироқ қилишмоқда. Мен доим ортимга хавотир билан қараб яшашга мажбурман. Бу “хато” ҳаётим учун қандай узоқ муддатли салбий оқибатларга олиб келишини фақат тасаввур қила оламан холос”, дейди у.

Адлия вазирлиги аввалроқ “жабрланувчиларни ҳимоя қилишга жуда жиддий ёндашишини” ва ҳужжатлар нотўғри таҳрирлангани сабабли шахслари очиқланган жабрланувчилар хабар берганидан сўнг, сайтдан Эпштейнга тегишли бир қатор материалларни олиб ташлаганини билдирган. Вазирлик хатолар “техник ёки инсон омили” сабабли юз берганини қайд этган.

Конгрессмен Роберт Гарсия тингловлар айнан Флоридада – Эпштейннинг жиноятлари “илк бор маълум бўлган жойда” ўтказилганини айтган. Демократлар Эпштейнга йиллар давомида жавобгарликдан қочиш имконини берган Америка адлия тизимига нисбатан саволлар ҳамон очиқ қолаётганини таъкидлаган.

Тинглов давомида Эпштейннинг яна бир қурбони – Мария Фармер ҳам сўзга чиққан. У илк бор 1996 йилда жиноятлар ҳақида хабар берганини, аммо ўшанда ҳуқуқ-тартибот идоралари ҳеч қандай чора кўрмаганини айтган.

Маълумот учун, Жеффри Эпштейн 2019 йилда одам савдоси ва эксплуатация айблови бўйича судни кутаётган вақтида Нью-Йорк қамоқхонасида вафот этган эди.

Эслатиб ўтамиз, аввалроқ педофилликда айбланган марҳум молиячи Жеффри Эпштейн ўз оролидаги “масжид” учун Ўзбекистондан кошин сотиб олгани ҳақида хабар берилган эди.