ВКонтакте ва Odnoklassniki’да энг кўп муҳокама қилинган футболчилар маълум қилинди

Аргентиналик Лионель Месси, португалиялик Криштиану Роналду ва франциялик Килиан Мбаппе ВКонтакте ва Odnoklassniki ижтимоий тармоқлари талқинига кўра Қатардаги Жаҳон чемпионатида энг кўп муҳокама қилинган футболчиларга айланди. Бу ҳақда ТАСС нашри хабар берди.

ВКонтактенинг энг кучли учлиги Месси, Роналду ва Мбаппе бўлди. Ижтимоий тармоқдаги очиқ постлар ва изоҳлардаги муҳокама бўйича тўртинчи ўринни Неймар (Бразилия), бешинчи – Анхель Ди Мария (Аргентина), олтинчи – Эмилиано Мартинес (Аргентина) эгаллади. Лука Модрич (Хорватия), Оливье Жиру (Франция), Доминик Ливакович (Хорватия) ва Винисиус Жуниор (Бразилия) ҳам энг кўп муҳокама қилинган ўн футболчи қаторидан жой олди.

Odnoklassniki талқинига кўра, дастлабки уч ўринни ВКонтактедаги каби Месси, Роналду ва Мбаппе эгаллаган. Оливье Жиру тўртинчи, Модрич бешинчи, Ришарлисон (Бразилия) эса олтинчи ўринда қайд этилди. Кучли ўнталикдан мос равишда Гави (Испания), Деян Ловрен (Хорватия), Ливакович ва Ди Мария жой олди.

Аргентина терма жамоаси Қатарда бўлиб ўтаётган Жаҳон чемпионати финалида Франция терма жамоасини пеналтилар сериясида 4:2 ҳисобида мағлуб этиб, учинчи бор кубокни қўлга киритди. Учинчи ўрин учун кечган баҳсда марокашликларни 2:1 ҳисобида мағлуб этган хорватлар бронза медалларини қўлга киритди.