Венгрияга туркман газини етказиб бериш бўйича битим имзоланди

Будапешт ва Ашхобод Венгрияга туркман газини етказиб бериш бўйича сиёсий келишув имзолади. Бу ҳақда Венгрия Ташқи ишлар вазири Петер Сийярто маълум қилди. 

“Туркманистон томонидан Венгриянинг туркман газини Европага потенциал етказиб бериш йўналишларидан бири ва транзит мамлакатлардан бирига айланиши учун сиёсий иродаси ва сиёсий нияти аниқ. Сиёсий келишув тузилди, энди навбат компанияларга тижорий музокараларни давом эттиришга етди”, дейди Сийярто.

Кеча, 20 август куни Туркманистон Президенти Сердар Бердимуҳамедов Будапештда Венгрия Бош вазири Виктор Орбан билан учрашганди.

Венгриянинг MTI агентлиги хабарига кўра, мамлакатлар нафақат энергетика, балки соғлиқни сақлаш, фармацевтика саноати, қишлоқ хўжалиги, озиқ-овқат саноати, сув хўжалиги, шунингдек, таълим ва маданият соҳаларида ҳамкорликни кенгайтириш бўйича музокара ўтказган.

Бердимуҳамедов кеча Венгрия пойтахтида бўлиб ўтаётган енгил атлетика бўйича жаҳон чемпионатида фахрий меҳмонлар қаторида бўлди. Ушбу чемпионатни Ўзбекистон Президенти Шавкат Мирзиёев ҳам кузатиб, бир неча давлат раҳбарлари билан суҳбатлашди.

Эслатиб ўтамиз, олдинроқ Хитойга йирик ҳажмдаги газ етказиб берувчи Туркманистон Россияни Туркманистон-Хитой газ қувурига улашни режалаштирмаётгани ҳақида хабар бергандик. 

Шунингдек, Туркманистон Европа Иттифоқига туркман газини етказиб бериш режалаштирилган Транскаспий газ қувури лойиҳаси бўйича европалик шериклар билан ҳамкорликни давом эттиришга тайёрлигини билдирганди.