Венгрия ЕИнинг Украина бўйича баёнотига бойкот эълон қилди

Венгрия Бош вазири Виктор Орбан Европа Иттифоқига аъзо давлатлар томонидан Аляскада АҚШ Президенти Дональд Трамп ва Россия Президенти Владимир Путиннинг Украина бўйича музокаралари бўлиб ўтиши фонида эълон қилинган баёнотни имзолашдан бош тортди. Бу ҳақда у ўзининг X ижтимоий тармоғидаги cаҳифасида маълум қилди.

Орбаннинг таъкидлашича,  Европа Кенгаши Президентлар тарихий учрашувидан атиги тўрт кун олдин Европа Иттифоқининг барча давлат ва ҳукумат раҳбарлари номидан баёнот беришга ҳаракат қилган.

“Либерал-оқим тарафдорлари ўзларининг севимли “Путиннинг қўғирчоғи” қўшиғининг янги талқинини бошлашидан аввал, мен нима учун Венгрия номидан баёнотни қўллаб-қувватлай олмаганим сабабини айтишга қарор қилдим”, деб ёзган Орбан қуйидаги сабабларни санаган ҳолда:

1. Баёнотда Европа Иттифоқи етакчилари таклиф қилинмаган учрашув учун шартлар қўйишга ҳаракат қилинган.
2. Европа Иттифоқи четда қолиб кетгани ачинарли ҳолдир. Аҳволни ёмонлаштириши мумкин бўлган ягона нарса – бу бизнинг ўриндиқдан туриб кўрсатма беришимиз.
3. Европа Иттифоқи етакчилари учун ягона оқилона ҳаракат АҚШ-Россия учрашуви мисолида Европа Иттифоқи-Россия саммитини бошлашдир.

Шунингдек, у ўз пости якунида тинчликка имкон берилиши кераклигини таъкидлаган.

Эслатиб ўтамиз, олдинроқ Венгрия Бош вазири Виктор Орбан Украинага Европа Иттифоқига аъзо бўлиш ўрнига, Россия ва ЕИ ўртасидаги буфер давлатга айланишни таклиф қилганди.

Дилбар Шоакромова