Венесуэланинг вақтинчалик президенти АҚШга ён босишни бошлади 

АҚШ Президенти Дональд Трампнинг буйруғига биноан Америка ҳарбийлари томонидан Венесуэла раҳбари Николас Мадуронинг қўлга олинишидан сўнг, унинг ўрнини вақтинча эгаллаб турган вице-президент Делси Родригес мамлакатнинг тинчлик ва ҳамкорликка содиқлигини яна бир бор тасдиқлади ва АҚШ ҳамда минтақадаги бошқа давлатлар билан тенглик ва суверенитетни ҳурмат қилиш тамойилларига асосланган халқаро муносабатларни ривожлантиришни устувор вазифа сифатида белгилашини айтиб ўтди. У бу ҳақда ўзининг Instagram’даги профилида айтиб ўтди.

Родригеснинг таъкидлашича, Венесуэла ташқи таҳдидларсиз, ҳурмат ва халқаро ҳамкорлик муҳитида яшашни орзу қилади.

“Биз АҚШ ҳукуматини халқаро ҳуқуқ доирасида, умумий ривожланишга қаратилган ҳамкорлик кун тартибини амалга оширишга чақирамиз, бу эса барқарор жамоавий яшашни мустаҳкамлашга хизмат қилади”, дейди президент вазифасини вақтинча бажарувчи.  

Шунингдек, Родригес постида Трампга мурожаат қилиб, халқи урушга эмас, аксинча, тинчлик ва мулоқотга лойиқ эканини, ҳатто Мадуро ҳам доим шундай фикрда бўлганини қайд этган. 

“Мен барча венесуэлаликлар бирлашиши мумкин бўлган Венесуэлани орзу қиламан. Венесуэланинг тинчлик, ривожланиш, суверенитет ва келажак ҳуқуқи бор”. 

Эслатиб ўтамиз, аввалроқ Дональд Трамп Венесуэлада вақтинча президент вазифасини бажарувчи Делси Родригеснинг ҳаракатлари ҳам АҚШга маъқул келмаса, унинг тақдири Мадуронинг тақдирига ўхшаш ёки ундан ҳам оғирроқ бўлишини айтиб, уни огоҳлантирганди.