Венесуэланинг вақтинчалик президенти билан “Мадуродан ҳам баттарроқ” нарса содир бўлиши мумкин – Трамп

АҚШ Президенти Дональд Трамп Венесуэлада вақтинча президент вазифасини бажарувчи Делси Родригесга огоҳлантириш берди. Бу ҳақда Оқ уй раҳбари кеча, 4 январь куни журналистлар билан Air Force One самолёти бортидаги суҳбат чоғида сўз очди.

Журналистлар ундан агар Венесуэла муваққат раҳбарининг ҳаракатлари АҚШга маъқул келмаса, унинг тақдири Мадуронинг тақдирига ўхшаш ёки ундан ҳам оғирроқ бўладими, деб сўрашган. Трамп бунга жавобан: “Ёмонроқ, анча ёмонроқ”, деган.

Трампнинг қўшимча қилишича, агар Родригес “тўғри ҳаракат қилмаса, ушбу ўйин яна қайтададан ўйналади”. 

“Агар у тўғри иш қилмаса, унга ўтирган жойи жуда қимматга тушади”, дея таъкидлаган Америка Президенти. 

Қайд этиш жоиз, Венесуэла Олий суди мамлакат вице-президенти Делси Родригесни Президент Николас Мадуронинг ўғирлаб кетилиши муносабати билан вақтинча президент вазифасини бажарувчи этиб тайинлашга қарор қилганди. Делси Родригес эса баёнот бериб, АҚШ билан мувозанатли ва ўзаро ҳурматга асосланган муносабатларни йўлга қўйишни устувор вазифа деб атаган ҳамда Вашингтонга қўшма кун тартиби устида ишлашни таклиф қилган. 

Эслатиб ўтамиз, Мадурони ўғирлаб кетиш сценарийси 3 январь куни муваффақиятли амалга оширилган эди. Трампнинг одамлари Венесуэла етакчиси билан бирга унинг рафиқасини ҳам қўлга олган. АҚШ расмийлари эр-хотинни “наркотерроризм”да айбламоқда. Халқаро майдонда эса Трампнинг бу юриши кескин танқидларга сабаб бўлмоқда. Улар ичида ҳатто Россия ҳам бошини кўтариб, Трампни “халқаро ҳуқуқ меъёрлари”ни бузганликда айблади. Шу билан АҚШ билан муносабатлари яхши бўлмаган мамлакат етакчилари ҳам ўз хавфсизлигидан чўчиб қолди, десак хато бўлмайди.