Венесуэла Ҳукумати Мадуронинг қаердалигини билолмаяпти – ОАВ

АҚШ зарбаларидан кейин Венесуэла Президенти Николас Мадуронинг қаерда эканлиги номаълум. Бу ҳақда “The New York Times” газетаси хабар берди. 

“Биз Мадуро ҳозир қаерда эканлигини билмаймиз. Аммо, у билан гаплашган икки кишининг сўзларига кўра, унинг яқин доирасининг ҳеч бўлмаганда бир қисми хавфсиз кўринади”, дейилади мақолада.  

Мамлакат расмийлари АҚШдан Президентнинг тириклиги бўйича кафолат сўрамоқда. 

Газета ўтган йилнинг декабрь ойида Мадуро АҚШ маъмурияти Дональд Трампнинг таҳдидлари фонида шахсий хавфсизлигини кучайтиргани ҳақида хабар берган эди. Венесуэла ҳукуматига яқин манбаларга кўра, у тез-тез ётоқхонаси ва уяли телефонларини алмаштириб турган. “The New York Times” манбаларидан бири шунингдек, сиёсатчи АҚШнинг потенциал зарбасидан ҳимояланиш учун шахсий ҳимоясида кубалик тансоқчиларнинг ролини кенгайтирганини маълум қилган.  

3 январь куни Венесуэла Ташқи ишлар вазирлиги ресурсларни эгаллаб олиш ва режим ўзгаришига олиб келиш мақсадида пойтахтга АҚШ томонидан ҳужум қилинганини билдирди. Ҳужумлар фонида Мадуро мамлакатда фавқулодда ҳолат эълон қилди ва Мудофаа қўмондонлигини жойлаштиришни буюрди.

Кўп ўтмай, АҚШ Президент Дональд Трамп Венесуэла Президенти Николас Мадуро ва унинг рафиқаси қўлга олиниб, мамлакатдан олиб чиқиб кетилганини маълум қилди.