Вашингтон Мадурони Венесуэла Президенти сифатида тан олмайди – Рубио

АҚШ Давлат котиби Марко Рубио бугун, 3 январь куни X (собиқ Twitter)га олти ойлик хабарининг скриншотини жойлаштирди ва унда Вашингтон Николас Мадурони Венесуэла Президенти сифатида тан олмаслиги ёзилган. 

“Мадуро Венесуэла Президенти эмас ва унинг режими қонуний ҳукумат эмас. Мадуро мамлакатни эгаллаб олган наркотеррорчи ташкилот Cartel de los Solesр раҳбари. У Қўшма Штатларга гиёҳванд моддалар контрабандасида айбланмоқда”, дейилади 2025 йил 27 июлда чоп этилган хабарда. 

Шунингдек, Рубио сенатор Майк Лига АҚШ ҳарбийларининг Венесуэладаги нишонларга зарбалари Венесуэла президенти Николас Мадурони ҳибсга олганлар учун яширин операция эканлигини маълум қилди. Сенатор бу ҳақда Х’да хабар берди. 

Майк Лининг ёзишича, у Рубио билан телефон орқали суҳбатлашган, унда давлат котиби Мадуро Қўшма Штатлардаги жиноий айбловлар бўйича жавобгарликка тортилиши учун Қўшма Штатлар вакиллари томонидан ҳибсга олингани ва ҳарбий ҳаракатлар ҳибсга олиш буйруғини ижро этганларни қўриқлаш ва ҳимоя қилиш учун амалга оширилганини маълум қилган. 

АҚШ давлат котиби сенатор билан суҳбатда Николас Мадуро жиноий ишлар бўйича судга тортилишини маълум қилган. Шунингдек, Рубио мулоқотда Мадуро ҳибсга олингач, Қўшма Штатлар Венесуэладаги кейинги ҳаракатларни режалаштирмаётганига ишонтирган. 

АҚШнинг Венесуэлага ҳужуми

Эслатиб ўтамиз, аввалроқ Венесуэла пойтахти Каракас шаҳрида камида еттита портлаш содир бўлгани, шаҳар­нинг бир қисми электр энергиясиз қолгани ҳақида хабар берилган эди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини чақиришга чақирди. Шундан сўнг CBS телеканали АҚШ Президенти Дональд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Бундан олдин АҚШ зарбаларидан кейин Николас Мадуронинг қаердалиги номаълумлиги, бироқ унинг энг яқин атрофидагиларнинг айримлари хавфсиз жойда экани ҳақида хабарлар тарқалган эди. 

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди. Шундан сўнг Россия АҚШнинг Венесуэалага қилган ҳужумини қоралади.