Ўзбекистонда мавжуд салоҳият тўлиқ ишга солинмаётган спорт турлари эълон қилинди 

Ўзбекистонда мавжуд салоҳият тўлиқ ишга солинмаётган спорт турлари маълум қилинди. Бу ҳақда бугун, 13 февраль куни Ўзбекистон Президенти, Миллий Олимпия қўмитаси раиси Шавкат Мирзиёев раислигида ўтаётган видеоселектор йиғилишида сўз очилди.

Президентга кўра, бадминтонда бирорта лицензия қўлга киритилмаган. Камондан отиш спорт тури бўйича бор-йўғи 3 та лицензия олинган.

Олимпия ўйинларида енгил атлетика турлари бўйича 48 та дастур бор. Лекин енгил атлетика федерацияси сўнгги олимпиадада 5 та лицензия қўлга киритган, холос. 

Ядро, диск, найза улоқтириш, сакраш спорт турларида бирорта лицензия олинмади. Ёки 49 та сув спорти дастуридан бор-йўғи 4 таси бўйича лицензия қўлга киритилган.

Ўқ отиш спортини ривожлантириш учун мудофаа тизими ва “Ватанпарвар” ташкилотида барча шароит яратилган. Лекин бирорта спортчи Олимпиадага бормаган.

Ўзбекистонда яккакураш спорт турлари, миллий кураш ривожланган бўлса-да, юнон-рум кураши бўйича атиги 3 та лицензия олинган. 

Ўтган йили байдарка ва каноэда эшкак эшиш бўйича жаҳон чемпионати илк бор Ўзбекистонда ўтказилди. Лекин унда мезбонлар бирорта ҳам медаль қўлга киритмади.

Эслатиб ўтамиз, Президент Париждаги натижалар билан хотиржамликка берилмаслик кераклиги, Лос-Анжелес-2028 Олимпия ўйинларида Ўзбекистон кучли ўнталикка кириши мақсад қилингани ва бунинг учун мутасадди раҳбарлардан тортиб, туман ҳокимларигача барча қаттиқ ишлаши лозимлигини айтганди.