Ўзбекистонда 26 та банк 3,8 млрд сўмлик жаримага тортилгани айтилди

Ўзбекистонда 2022 йилда банк қонунчилиги талабларини бузганлиги учун 26 та банкка нисбатан 56 та ҳолат бўйича жами 3,8 миллиард сўм миқдорида жарималар ундирилди. Бу ҳақда кеча, 2 июнь куни бўлиб ўтган Ўзбекистон Республикаси Олий Мажлис Сенатининг қирқ биринчи ялпи мажлисида Марказий банкнинг 2022 йилги ҳисоботида маълум қилинди.

Таъкидланишича, 2022 йилда тижорат банкларида 19 та ва микромолия ташкилотларида 9 та тематик инспекциялар ўтказилган.

Текширувлар давомида қарийб 39 мингта мижознинг жами 37 триллион сўмлик кредитлари ёки ушбу банклар жами кредит портфелининг 58 фоизи қамраб олинган.

Текшириш натижалари асосида капитал ва ликвидлилик меъёрлари тўғрисидаги маълумотларни ҳаққоний акс эттирмаган банкларга нисбатан тегишли чоралар кўрилган. Қонун ҳужжатларида белгиланган талабларни бузган банкларга нисбатан айрим операцияларни тўхтатиш, жарима санкциялари ва бошқа таъсирчан чоралар қўлланилган.

Жумладан, банк қонунчилиги талабларини бузганлиги учун 26 та банкка нисбатан 56 та ҳолат бўйича жами 3,8 млрд сўм миқдорида жарималар ундирилган.

Банк қонунчилигида белгиланган талабларни бажармагани учун “Hi-Tech Bank” ва Туркистон” хусусий акциядорлик тижорат банкларининг банк фаолиятини амалга ошириш ҳуқуқини берувчи лицензиялари чақириб олинган ва банк омонатчиларининг маблағларини тўлиқ тўлаб берилиши таъминланган.

“Туркистон” хусусий акциядорлик тижорат банки омонатчилари маблағларини 251 млрд сўми фуқароларнинг банклардаги омонатларини кафолатлаш жамғармаси ҳисобидан қоплаб берилди.

Геосиёсий кескинлашувлар натижасида иқтисодий санкциялар ва экспортга тақиқлар билан боғлиқ хатарларни иқтисодиётга салбий таъсирларини минималлаштириш, комплаенс-назорат тизимини такомиллаштириш борасида ҳам тегишли ишлар амалга оширилди.