Ўзбекистон СИдан фойдаланиш даражаси энг паст давлатлар қаторига кирди

Ўзбекистон сунъий интеллектдан фойдаланиш даражаси бўйича дунёнинг 147 мамлакати орасида 141-ўринни эгаллади. Мамлакатда нейрон тармоқлардан фойдаланиш даражаси атиги 6,3 фоизни ташкил этмоқда. Бу ҳақда “Microsoft Institute for the Economy of AI” томонидан эълон қилинган 2025 йилги ҳисоботда сўз боради. 

Тадқиқотда операцион тизимлар ва қурилма турлари ўртасидаги фарқлар инобатга олиниб, фаол сунъий интеллект фойдаланувчилари улуши асос сифатида белгиланган. Рейтингнинг юқори поғоналаридан Бирлашган Араб Амирликлари, Сингапур ва Норвегия жой олган. Ушбу мамлакатларда сунъий интеллектни қўллаш даражаси 45,3 фоиздан 64 фоизгача етган. Глобал рейтингнинг энг охирги ўринларини эса Тожикистон, Туркманистон ва Камбоджа эгаллаган (145–147-ўринлар).

Паст ўринга қарамай, Ўзбекистонда ижобий ўсиш тенденцияси кузатилмоқда. Жумладан, 2025 йил июль ойининг бошида сунъий интеллектдан фойдаланиш даражаси 5,7 фоизни ташкил этган бўлса, йилнинг иккинчи ярмига келиб бу кўрсаткич 6,3 фоизга етган.

Microsoft мутахассислари 2025 йил учун асосий тенденциялардан бири сифатида DeepSeek платформасининг жадал ўсишини қайд этди. Ушбу очиқ экотизим, айниқса, Ғарб технологик ечимлари етарли даражада тақдим этилмаган бозорларда оммалашиб боряпти.

DeepSeek’дан фойдаланиш географияси Америка сунъий интеллект платформаларидан сезиларли даражада фарқ қилади. Хусусан, платформа қатор Осиё ва Африка мамлакатларида кескин ўсишни намойиш этмоқда. Бироқ Ўзбекистонда DeepSeek’нинг улуши йил охирига келиб 5 фоиздан кам бўлган. Таққослаш учун, Россияда ушбу кўрсаткич 43 фоизга етган.

Эслатиб ўтамиз, аввалроқ Ўзбекистонда келаси йилдан ўқувчи ва талабаларга сунъий интеллектни ўқитиш бошланиши ҳақида хабар берилганди.