Ўзбекистон МТЖ Суперлига клубларига қарши майдонга тушади

Футбол бўйича Жаҳон чемпионатига тайёргарлик кўриш мақсадида Фабио Каннаваро бошчилигидаги Ўзбекистон миллий терма жамоаси жорий йилнинг май ойида Суперлиганинг етакчи клубларига қарши ўртоқлик ўйинларида иштирок этади. Бу ҳақда Ўзбекистон профессионал футбол лигаси (ЎзПФЛ) хабар берди.

“Биз 2025 йил август ойида режалаштирилган тақвимга 24 соат ичида ўзгартириш киритиб, клубларга тақдим этдик ва улар белгиланган муддатда янги тақвимга розилик билдирди. Эндиликда терма жамоа жорий йилнинг 5 май санасидан эътиборан маҳаллий футболчилар иштирокида йиғинга киришади ва 10, 17, 24 май кунлари Суперлиганинг етакчи клубларига қарши учрашувларда иштирок этади. Жараён июнь ойидаги FIFA кунлари ҳамда Жаҳон чемпионатига уланиб кетади”, дейилади хабарда. 

Манбага кўра, май, июнь, июль ойлари давомида катта танаффус юзага келаётгани, бу эса Суперлига яхлитлигига таъсир кўрсатаётганлигини инобатга олган ҳолда, май ойининг қолган қисмида Ўзбекистон кубоги учрашувлари ўтказилиши режалаштирилган.  

Осиё кубоги-2027 тайёргарлиги сабаб Суперлиганинг иккинчи қисми 20 июлдан бошланиши белгиланди. Бу футболчиларга декабрь ойидаги асосий йиғин олдидан дам олиш ва куч йиғиш имконини беради.
Суперлиганинг сўнгги тури жорий йилнинг 3 декабрь санасига тўғри келади. Ўтиш ўйинлари ва Ўзбекистон кубогининг ярим финалида иштирок этмайдиган клублар шу санадан кейин танаффусга чиқади. Ўтиш ўйинидан жой олган жами тўрт учрашув қисқа вақт ичида ташкил этилиши мақсадида марказлаштирилган ҳолда Тошкент шаҳрида ўтказилади.