Ўзбекистон Лихтенштейнга илк элчисини юборди

Ўзбекистоннинг Лихтенштейн князлигидаги биринчи элчиси этиб тайинланган Дилшод Ахатов ушбу мамлакат валиаҳд шаҳзодаси Алоизга ишонч ёрлиқларини топширди. Бу ҳақда “Дунё” хабар берди.

Лихтенштейн валиаҳд шаҳзодаси Ўзбекистонда амалга оширилаётган ислоҳотларни ва икки давлат ўртасидаги кузатилаётган ўзаро манфаатли алоқаларни ривожлантириш бўйича саъй-ҳаракатларни қўллаб-қувватлаган. 

У тарихда илк бор мазкур мамлакатда Ўзбекистон элчисининг тайинланганини алоҳида эътироф этган.

Лихтенштейн ва Ўзбекистон ўртасида 2024 йил март ойида ўрнатилган дипломатик алоқалар ҳамкорликни тизимли равишда давом эттиришга муҳим пойдевор бўлгани, Вадуснинг Тошкент билан муносабатларни кенгайтириш ва мустаҳкамлаш тарафдори экани таъкидланган. 

Учрашув якунида шаҳзода Алоиз Ўзбекистон Президенти Шавкат Мирзиёевга эзгу-тилаклари ва самимий саломларини йўллаган ҳамда Ўзбекистон халқига тинчлик ва фаровонлик тилаган. 

Шунингдек, Ўзбекистон делегацияси Лихтенштейн Бош вазири ўринбосари – Ташқи ишлар, атроф-муҳит ва маданият вазири Сабине Монауни билан учрашув ўтказган. Суҳбат чоғида икки мамлакатнинг БМТ ҳамда бошқа халқаро ташкилотлар доирасидаги конструктив мулоқоти юксак баҳоланган.

Эслатиб ўтамиз, Дилшод Ахатов 2023 йилнинг октябрь ойида Ўзбекистоннинг Германиядаги элчиси сифатида Германия Президенти Франк-Вальтер Штайнмайерга ишонч ёрлиқларини топширган эди. Бугунги кунга қадар Дилшод Ахатов Ўзбекистоннинг Швейцария ва Чехиядаги ўриндошлик асосида элчиси ҳам ҳисобланади.