Ўзбекистон дзюдочилари халқаро мусобақада тарихий натижа қайд этди

Жорий йилнинг 3-5 март кунлари Тошкент шаҳрида дзюдо бўйича “Катта дубулға” турнири бўлиб ўтди. Дунёнинг 50 га яқин мамлакатидан келган тажрибали дзюдочилар қатнашган мусобақада мезбонлар тарихий натижага эришди.

Турнирда ўзбекистонлик спортчилар 3 та олтин, 1 та кумуш ва 4 та бронза, жами 8 та медалга сазовор бўлди. Муросасиз беллашувларда Муроджон Йўлдошев -73 кг, Давлат Бобонов -90 кг ва Алишер Юсупов +100 кг вазн тофасида олтин медалга эга чиқди. -66 кг вазн тоифасида Сардор Нуриллаев шоҳсупанинг 2-поғонасидан жой олди.

Достон Рўзиев, Муҳриддин Тиловов ва Мусо Собиров мусобақанинг бронза медалини қўлга киритди.

Қизлар ўртасида -70 кгда мамлакат шарафини ҳимоя қилган тажрибали Гулноза Матниёзова 3-ўрин учун баҳсда украиналик Наталья Чистяковадан беллашув якунланишига 4 сония қолганда устун келди.

Умумжамоа ҳисобида Ўзбекистон термаси дзюдо ватани Япониядан кейин 2-ўринни банд этди. Бу “Катта дубулға” турнирларида медаллар сони бўйича Ўзбекистон терма жамоаси учун янги рекорд ҳисобланади.