Ўз режамиз ва стратегиямиз бор – Каннаваро 

Ўзбекистон миллий терма жамоаси бош мураббийи Фабио Каннаваро Португалияга қарши бўлиб ўтадиган Жаҳон чемпионати гуруҳ босқичи 2-тур учрашуви олдидан ўз фикрлари билан ўртоқлашди.

Италиялик мутахассис рақибнинг юқори савиясини алоҳида таъкидлаб, Португалияни турнирнинг энг кучли жамоаларидан бири деб атади.

“Рақибимиз Жаҳон чемпионатидаги энг кучли жамоалардан бири. Уларнинг қанотларда жуда кучли футболчилари бор, ярим ҳимоя чизиғи дунёнинг энг яхшиларидан бири саналади. Шунингдек, футбол тарихидаги энг буюк ўйинчилардан бири ҳам ушбу жамоа сафида тўп тепмоқда. Шу боис бу осон ўйин бўлмайди. Аммо биз Жаҳон чемпионатидамиз ва ижобий натижага эришиш учун жамоа бўлиб ҳаракат қилишимиз ҳамда меҳнат қилишимиз керак”, дейди Каннаваро.

Мураббийнинг таъкидлашича, мураббийлар штаби Португалиянинг ўйин услубини чуқур таҳлил қилган.

“Португалия тўп назорати орқали ўйинни бошқаришни яхши кўради. Улар учрашувни фаол бошлаб, имкони борича тезроқ устунликка эришишга интилади. Биз ҳам бунга тайёргарлик кўрдик. Ўз режамиз ва стратегиямиз бор. Майдонда айнан ўз ўйинимизни кўрсатишга ҳаракат қиламиз. Кучли рақибга қарши ўйнаётганимизни биламиз, аммо бундан қўрқмаймиз”,  дейди у.

Каннаваро Криштиану Роналду ҳақида ҳам тўхталиб ўтди.

“Биз фақат Роналдуга қарши ўйнамаяпмиз. У футбол тарихидаги энг буюк футболчилардан бири, аммо Португалия фақат ундан иборат эмас. Асосий таркиб ва захирада ҳам юқори савияли футболчилар кўп. Шунга қарамай, жарима майдонида Роналдуни бир лаҳза ҳам эътиборсиз қолдириб бўлмайди. У стандарт вазиятларда ҳам, ўйин давомида ҳам исталган пайт гол уришга қодир”,  деди мураббий.

Шунингдек, Каннаваро жамоанинг жисмоний ҳолати яхшиланганини қайд этди.

“Жамоага келганимиздан буён асосий эътибор футболчиларнинг жисмоний ҳолатини яхшилашга қаратилди. Сўнгги учрашувда футболчиларнинг ҳолати яхши эканини кўрдик. Жамоа ўйинни юқори темпда якунлади ва барча ўзини яхши ҳис қилди”,  дейди у.

Мураббий статистика масаласига ҳам тўхталиб, футболдаги асосий омиллардан бири тўпни назорат қилиш эканини таъкидлади.

“Менимча, агар жамоа ўйин давомида тўпни кўп йўқотса, уни қайтариб олиш учун ҳам кўпроқ куч сарфлайди. Шунинг учун масала кўп югуришда эмас, тўғри ҳаракат қилишда. Тўпни йўқотмаслик ва уни қаерда қайтариб олишни билиш жуда муҳим. Португалиянинг статистикаси кўп жиҳатдан юқори даражада эканини биламиз ва буни таҳлил қилганмиз”, дейди Фабио Каннаваро.

Эслатиб ўтамиз, Португалия ва Ўзбекистон учрашуви бугун, 23 июнь куни Тошкент вақти билан соат 22:00 да бошланади. Баҳсни марокашлик ҳакам Жалол Жайед бошқариб боради.