“Уй, машина сўраяпти”. Озода Нурсаидованинг ижодий гуруҳи съёмкадаги бахтсиз ҳодиса бўйича изоҳ берди (видео)

Аввалроқ, Ўзбекистонда хизмат кўрсатган артист Озода Нурсаидованинг қўшиғи учун клип суръатга олиш жараёнида актриса Сабрина Жабборовани автомобиль босиб кетгани, шундан сўнг у ёрдам сўраб пост қолдиргани хабар қилинганди. Орадан кўп ўтмай хонанданинг ўша клипида ишлаган ижодий жамоа мазкур вазият бўйича тушунтириш берди.

Уларнинг айтишича, хонанда Озода Нурсаидова клипни суратга олиш жараёнида қатнашмаган. Шунингдек, улар актрисанинг мурожаатида келтирилган ҳеч қандай биринчи ёрдам кўрсатилмагани ҳақидаги иддаони рад этган.

“Ваҳоланки, биринчи ёрдам кўрсатилган. Телефонда ҳар битта қилинган иш бўйича, шифохонага биринчи кундан борганимиздан тортиб ҳозиргача қилинган нарсалар, онаси билан гаплашилган гаплар, ҳаммаси ёзилган”, дейди улар. 

Шунингдек, ижодий жамоа бу воқеа ортидан уларга уй олдиришмоқчи бўлишганини айтди. Шу билан бирга, улар ҳолат бўйича тергов давом этаётганини, якуний қарорни эса суд чиқаришини таъкидлаган. 

“У ерда бахтсиз воқеа бўлган. Атайлаб ҳеч ким бир нарса қилмаган. У қиз яқинда оёққа турибди. Чунки унга яқингача қаралган. Фақат бу ердагилар эмас, жамоадаги ҳамма келиб қараган унга. Ишлай олмайди, ётиши керак деб, ойма-ой 500 доллардан берилган. Ҳаммасининг ҳужжати, видеолари бор. Лекин бу нарса қилиняпти, қилиняпти-да, кимлардир ақл ўргатиши сабабли энди охирида келиб, уй талаб қилиняпти, машина талаб қилиняпти. Энди инсоф билан-да. Бу нарсалар чин юракдан, Аллоҳ розилиги учун қилинган, айбдорлиги учун эмас. Ҳеч кимнинг айби йўқ бу ерда”, деди оператор Шуҳрат Мавлонов.