Озода Нурсаидованинг клипи съёмкаси вақтида актрисани “гелик” босиб кетди

Ўзбекистонда хизмат кўрсатган артист Озода Нурсаидованинг қўшиғи учун клип суръатга олиш жараёнида актриса Сабрина Жабборовани автомобиль босиб кетган. Бу ҳақда актрисанинг ўзи Instagram'даги саҳифасида маълум қилди.

Унинг ёзишича, клипда суратга тушаётган бошқа бир вояга етмаган актриса оператор ва режиссёр Шуҳрат Мавлоновнинг кўрсатмаси билан Mercedes-Benz G-класс (“гелик”) автомобилини ҳайдаган, бироқ ўша пайтда у машина бошқарувини йўқотган. Машинанинг ғилдираклари Сабрина устидан икки марта ўтиб кетган: олдинги ғилдираги бутунлай унинг устидан ўтган, орқа ғилдираги эса қизнинг устида айланиб кетган. Воқеа оқибатида Сабринанинг тос суяги синган, бошқа аъзолари оғир жароҳат олган.

“Жабрланувчига биринчи ёрдам вақтида кўрсатилмагани натижасида кўп қон йўқотган. Кейин уни 4-сонли шифохонага олиб боришган, 9 соатлик операциядан сўнг беморнинг ҳаёти сақлаб қолинган. Бироқ жарроҳлик амалиёти нотўғри бажарилгани оқибатида унинг чап оёғи ўнг оёғидан 7 см узунроқ бўлиб, қиз ногирон бўлиб қолган”, дейилади хабарда.

Билдирилишича, айни вақтда шифокорлар қизнинг саломатлигини тиклаш учун унинг тос суягини синдириб, суякларни тўғрилаш кераклиги, бундай операциялар жуда камдан кам ҳолатларда муваффақиятли ўтишини айтган.

Шунингдек, актриса вояга етмаган қизни “суратга олиш жараёнига Аҳад Қаюм олиб келгани ва унга ҳайдашга рухсат бергани”ни ёзиб қолдирган. Унинг сўзларига кўра, суратга олиш ташкилотчилари ва бошқа айбдор шахслар жабрланувчига етарлича ёрдам кўрсатмаган. Фақатгина 4 ой давомида “фильмни суратга олишда техник қоидаларни бузганлиги” учун жарима сифатида 500 доллар тўлаб турган.

Мазкур ҳодиса бўйича иш судга оширилган, лекин ҳали суд жараёни бошланмаган. Сабрина терговчи унга иш материалларини тақдим қилмаганини айтган.

Шунингдек, Сабрина нормал юриш қобилиятини тиклаш учун чет элда такрорий операция ўтказиши кераклигини айтган ва жамоатчиликдан ёрдам сўраган.