Трамп жамоаси Путин билан музокараларга ҳозирлик кўрмоқда 

АҚШнинг сайланган президенти Дональд Трампнинг жамоаси унинг Россия Президенти Владимир Путин билан Украинадаги урушни тугатиш вариантларини муҳокама қилиш учун учрашувига ҳозирлик кўрмоқда. Бу ҳақда кеча, 12 январь куни Трамп ўзининг миллий хавфсизлик бўйича маслаҳатчиси этиб тайинламоқчи бўлган республикачи конгрессмен Майкл Уолтц ABC News телеканалига маълум қилди.

"Тайёргарлик ишлари олиб борилмоқда. Президент Трамп нуқтаи назаридан қаралса, бошқа томон билан қандайдир алоқа ва мулоқотни сақламасдан туриб, келишувга эриша олмайсиз. Ва биз буни келгуси ойларда албатта қиламиз", деди Уолтц.

Бошловчининг бу фақат Трамп ва Путин учрашуви бўладими ёки Украина Президенти Владимир Зеленский ҳам иштирок этадими деган саволига Уолтц қуйидагича жавоб берди:

"Бунинг учун аниқ асосни белгилаб бердингиз. Биз бу борада ишлаяпмиз. Лекин мен ҳеч бўлмаганда кейинги бир неча кун ва ҳафталарда қўнғироқ бўлишини кутяпман".

Унинг қўшимча қилишича, музокараларни бошлашда фронтдаги вазиятнинг барқарорлашуви ва украиналикларнинг бунга қўшган ҳиссаси муҳим роль ўйнайди. Хусусан, у Украина Қуролли Кучларининг ҳарбий кадрлар етишмаслиги билан боғлиқ муаммоларга ишора қилиб, уларни "ҳал қилиш керак"лигини ва Украинада чақирув ёши ҳозир "18 ёшдан эмас, 26 ёшдан" эканини эслатиб ўтди.

"Менимча, кўпчилик юз минглаб янги қўшинларни олиб келиш мумкинлигини тушунмайди... Фронтдаги маънавий қийинчиликлар ва муаммолар ҳақида эшитганимизда, шуни таъкидлаш керакки, агар украиналиклар бутун дунёни демократияни ҳар қандай ҳолатда ҳам қўллаб-қувватлашга чақирса, уларнинг ўзлари ҳам демократияни қўллаб-қувватлашлари керак. Албатта, улар жасорат билан жанг қилди, жангни олижаноблик ва қатъият билан қабул қилдилар, аммо ишчи кучи билан боғлиқ бу муаммоларни ҳал қилиш керак", деди Уолтц.

Шунингдек, ўт очишни тўхтатиш келишувининг кучга кириши учун реал вақт оралиғини изоҳлар экан, у шундай деди:

"Биз уни ҳар дақиқа, ҳар куни кўришни хоҳлаймиз. Ўйлайманки, бу ҳар икки томон учун ҳам ниҳоятда ижобий биринчи қадам бўлади. Ва бу бизга қандайдир музокаралар олиб борадиган ечим доирасига киришимизга имкон беради".

Майкл Уолтцнинг қўшимча қилишича, у “ҳар бир сўнгги россияликни Украина тупроғининг ҳар бир қаричидан, ҳатто Қримдан” чиқариб юборишни реал эмас деб ҳисоблайди.

"Президент Трамп бу ҳақиқатни тан олди. Менимча, бутун дунё бу воқеликни тан олиш жараёнида бўлгани олдинга ташланган катта қадам. Келинг, бу можаро доимий бўлиб қолмаслиги ва бутун дунёга таҳдид соладиган даражада авж олмаслиги учун олдинга интилайлик", деди у.

Эслатиб ўтамиз, 9 январь куни Трамп Мар-а-Лагодаги мулкида республикачи губернаторлар билан учрашув олдидан у ва Путин ўртасида учрашув режалаштирилганини айтганди. Кремль матбуот котиби Дмитрий Песков ҳам Путин Трамп билан олдиндан ҳеч қандай шартларсиз учрашишга тайёр эканини маълум қилди. Швейцария Ташқи ишлар вазирлиги вакили Николас Бидо жорий йилнинг 10 январь куни чоп этилган маҳаллий “Le Теmps” нашрига берган интервьюсида Трамп ва Путин ўртасида кутилаётган учрашув Швейцарияда бўлиб ўтиши мумкинлигини билдирди.