Трамп Путин билан учрашмоқчи 

АҚШнинг сайланган президенти Дональд Трамп ва Россия Президенти Владимир Путин ўртасида учрашув режалаштирилган. Бу ҳақда кеча, 9 январь куни Трамп Мар-а-Лагодаги мулкида республикачи губернаторлар билан учрашув олдидан маълум қилди.

"Президент Путин учрашмоқчи ва биз буни ташкил қиламиз. У ҳатто буни очиқ айтди ва биз бу урушни тугатишимиз керак. Бу қонли тартибсизлик", деди Трамп Россиянинг Украинага қарши уруши ҳақида гапирар экан.

Трамп икки етакчи ўртасидаги мумкин бўлган музокаралар вақтини очиқламади.

Трампнинг 20 январь куни Оқ уйга қайтиши Москва 2022 йил февралида Украинага бостириб кириши билан бошланган можарони дипломатик йўл билан ҳал қилишга умид уйғотди. Бироқ Киев тезкор тинчлик келишуви Украинага жуда қимматга тушишидан хавотирда. Трампнинг маслаҳатчилари урушни тугатиш режаларини таклиф қилди, бу эса яқин келажак учун Украина ҳудудининг муҳим қисмини Россияга самарали тарзда ўтказиш имконини беради.

Россия босқини бошланганидан бери Жо Байден бошчилигидаги Қўшма Штатлар Украинага 175 миллиард доллардан кўпроқ, жумладан, хавфсизлик учун 60 миллиард доллардан кўпроқ ёрдам кўрсатди. Бироқ урушни тезда тугатишни истаётганини айтган Трамп маъмурияти даврида ёрдам бир хил даражада давом этадими ёки йўқлиги ноаниқлигича қолмоқда.

Кремль матбуот котиби Дмитрий Песков кеча, 9 январь куни аввалроқ Путин Трампнинг алоқа ўрнатиш истагини олқишлаганини, бироқ ҳозирча Кремлга ҳеч қандай расмий сўров юборилмаганини айтди. Песковнинг сўзларига кўра, Трамп лавозимга киришгунча кутиш тўғрироқ бўлади.

Украина Президенти Владимир Зеленский эса аввалроқ Трамп Россия билан 34 ойлик уруш якунида ҳал қилувчи роль ўйнаши ва Путинни тўхтатишга ёрдам бериши мумкинлигини айтган.