Усик кейинги рақиби сифатида кимни кўриб чиқаётганини айтди

Мағлубиятга учрамаган 39 ёшли амалдаги WBA, WBC, IBF ва IBO оғир вазн тоифаси чемпиони украиналик Александр Усик вақтинчалик WBC оғир вазн тоифаси чемпиони, германиялик Агит Кабайел билан жанг бўйича музокараларни бошлашга тайёрлигини билдирди. Бу ҳақда Усик журналистлар билан ўтказилган матбуот анжуманида тўхталди.

Шунингдек Александр Усик голландиялик Рико Верховен билан реванш жангига қизиқишини тасдиқлади.

“Кабайел ажойиб йигит. Биз ҳамма нарсани жамоа ва ташкилотчилар билан муҳокама қиламиз, қандай қилиб олдинга силжишимиз ҳақида гаплашамиз. Турки Аль аш-Шейх эса, менга Нидерландияда Рико Верховенга қарши реванш жангини ташкил қилишни маслаҳат берди. Мен эса, бунга рози эканлигимни ва жангга тайёргарлик кўриш учун вақт бериши кераклигини айтим”, деди Усик матбуот анжуманида.

Эслатиб ўтамиз, жорий йилнинг 23 май куни Мисрда бўлиб ўтган профессионал бокс оқшомида Александр Усик 11-раундда Рико Верхувенни техник нокаут эвазига мағлуб этганини ва ушбу ғалабаси учун 100 миллион доллар ишлаб олгани ҳақида хабар бергандик.