Усик Фьюри билан учинчи жангни ўтказишни кўриб чиқмоқда – ОАВ

Украиналик боксчи Александр Усик 2027 йилда британиялик Тайсон Фьюрига қарши учинчи жангни ўтказиш имкониятини кўриб чиқмоқда. Бу ҳақда “The Ring” нашри хабар берди.

Манбага кўра, Усик WBA ва WBO версиялари бўйича биринчи ярим ўрта вазн тоифаси чемпиони, америкалик Дэвид Бенавидес билан жанг қилишга ҳам қизиқмоқда. Украиналик боксчининг кейинги рақиблари ҳақидаги қарор уларнинг яқинлашиб келаётган жанглари натижаларига боғлиқ бўлиши мумкин.

Фьюри жорий йилнинг 11 декабрь куни Кардиффда британиялик Энтони Жошуага қарши рингга кўтарилиши режалаштирилган. Бенавидес эса декабрь ойида WBC чемпиони, поляк боксчиси Михал Чеслак билан жангда иштирок этиши кутилмоқда.

Маълумот учун, 2024 йилнинг май ойида Усик Фьюрини мағлуб этиб, оғир вазн тоифасида мутлақ жаҳон чемпионига айланган эди. Ўша йилнинг декабрь ойида ўтказилган реваншда ҳам украиналик боксчи ҳакамлар қарори билан ғалаба қозонган.

39 ёшли Усик профессионал фаолияти давомида 25 та ғалабага эришган, уларнинг 16 тасини нокаут билан қўлга киритган. У ҳозиргача бирор марта мағлубиятга учрамаган. 38 ёшли Тайсон Фьюри эса профессионал фаолияти давомида 36 та ғалаба, икки мағлубият ва бир дуранг қайд этган. Унинг ҳар икки мағлубияти Александр Усикка қарши жангларда юз берган, Деонтей Уайлдер билан эса бир марта дуранг натижани қайд этган.