Усик Кабайелдан WBC чемпионлигини ҳимоя қилади

Бутунжаҳон бокс кенгаши (WBC) украиналик боксчи Александр Усикка оғир вазн тоифасидаги чемпионлик камарини германиялик Агит Кабайелга қарши ҳимоя қилишни буюрди. Бу ҳақда ташкилот президенти Маурисио Сулаймон “Sky Sports” нашрига маълум қилди.

Жорий йилнинг 23 май куни Усик Мисрдаги Гиза пирамидалари мажмуасида нидерландиялик кикбоксчи Рик Верхувенни ҳакамлар қарорига кўра мағлуб этиб, WBC чемпионлик унвонини ҳимоя қилган эди.

“WBC Усикнинг ихтиёрий равишда чемпионлик ҳимоясини ўтказишини қўллаб-қувватлади. Бу жангдан кейин ғолиб Кабайелга қарши рингга кўтарилиши керак эди. Бу жанг аввалдан режалаштирилган ва Усик учун мажбурий ҳисобланади. Ростини айтсам, бу қарордан мамнунман. Кўпчилик WBC’ни Верхувенга қарши чемпионлик жангига рухсат бергани учун танқид қилди. Энди эса, биз тўғри қарор қабул қилганимизни фахр билан айта оламан”, дейди Сулаймон.

Маълумот учун, 39 ёшли Усик профессионал фаолияти давомида 25 та жанг ўтказиб, барчасида ғалаба қозонган. Украиналик боксчи ўтган йилнинг ноябрь ойида Жаҳон бокс ташкилоти (WBO) чемпионлик унвонидан воз кечган эди. Ҳозирда у WBA, IBO, WBC ва IBF чемпионлик камарларига эгалик қилмоқда.

33 ёшли Агит Кабайел ҳам профессионал рингда мағлубият нималигини билмайди – у 27 та жангнинг барчасида ғалаба қозонган. Ҳозирда у WBC версияси бўйича оғир вазндаги вақтинчалик жаҳон чемпиони ҳисобланади.