“Ўшанда мен 80 ёшга тўламан”. Моуриньо “Сити” иши қачон якунланиши ҳақида ҳазил қилди

Португалиялик таниқли мураббий Жозе Моуриньо “Манчестер Сити”нинг молиявий қоидабузарликлари билан боғлиқ иши тез орада якунланишига шубҳа билдирди. Бу ҳақда Моуриньо “Corriere dello Sport” нашрига берган интервьюсида гапирди.

Моуриньо чўзилиб кетаётган ҳуқуқий жараёнларга ҳазил билан муносабатда бўлиб, якуний қарор чиқарилишини кутиш учун узоқ умр кўриш кераклигини таъкидлади.

“Аввал суд қарори бўлади, кейин апелляция... Ўша пайтга келиб мен 80 ёшга тўламан!” дея ҳазил қилди португалиялик мутахассис.

Маълумот учун, 2017-2018 йилги мавсумда Моуриньо бошчилигидаги “Манчестер Юнайтед” Англия Премьер-лигасида “Манчестер Сити”дан кейин иккинчи ўринни эгаллаган эди. Ўшандан бери португалиялик мураббий “Сити” чемпионлик унвонидан маҳрум қилинган тақдирда, “Манчестер Юнайтед”нинг ўша мавсумдаги натижасига таъсир қилиши мумкинлигини бир неча бор таъкидлаб келган.

Эслатиб ўтамиз, аввалроқ Абдуқодир Ҳусанов тўп сураётган “Манчестер Сити” клуби Премьер-лигадан четлатилиши ва Чемпионшипга ҳам қабул қилинмаслиги мумкинлиги ҳақида хабар берилган эди.