Уруш кенгаймоқда: АҚШ ва Саудия биргаликда Ироқдаги Эронга яқин гуруҳларни бомбалади

АҚШ ва Саудия Арабистони Эрон қўллаб-қувватлайдиган Ироқдаги қуролли гуруҳларга биргаликда зарба берди. Бу АҚШ Президенти Дональд Трамп ўтган ҳафта Эронга қарши ҳужумларни тўхтатганидан кейин Яқин Шарқда амалга оширилган илк АҚШ ҳаво ҳужуми бўлди. Бу ҳақда “Reuters” хабар берди.

Ироқ хавфсизлик тизими таркибига кирувчи, аммо Эрон томонидан қўллаб-қувватланадиган Халқ сафарбарлик кучлари маълумотига кўра, АҚШ ва Саудиянинг мамлакатдаги бир нечта базага берган зарбалари оқибатида камида 20 нафар жангчи ҳалок бўлган, 32 нафари яраланган.

Мосул шаҳрида ҳалок бўлганларнинг жасадлари шифохонадан олиб чиқилаётган вақтда йиғилганлар “Америкага ўлим!” деган шиорлар билан чиқиш қилган. Вашингтон ва Ар-Риёд ушбу зарбалар Саудиянинг нефт объектларига Ироқ ҳудудидан уюштирилган дрон ҳужумларига жавоб сифатида амалга оширилганини билдирган.

Бу Трамп ўтган ҳафта 13 кун давом этган Эронга қарши ҳаво кампаниясини тўхтатганидан кейин АҚШнинг минтақадаги биринчи йирик ҳарбий амалиёти бўлди.

Шунингдек, бу уруш давомида Саудия Арабистони биринчи марта АҚШ билан биргаликда зарбаларда иштирок этганини расман эълон қилди. Таҳлилчилар фикрича, бу сунний Саудия Арабистонининг Эроннинг шиа иттифоқчиларига қарши янги фронтда тўқнашувга жалб қилиниши орқали можарони янада кенгайтириши мумкин.

Ироқ ҳукумати эса фавқулодда йиғилиш чақирган. Мамлакат Президенти маъмурияти ушбу ҳужумларни “Ироқ суверенитетининг очиқдан-очиқ бузилиши” деб баҳолаган. Шу билан бирга, қўшни давлатларга қарши қуролли гуруҳлар ҳужумларини ҳам тўхтатишга чақирган.

Эрон АҚШ ва Саудия ҳужумларини АҚШ ҳамда Исроилнинг урушни бутун минтақага ёйишга қаратилган уриниши деб атаган. Эронга яқин “Ҳизбуллоҳ” гуруҳи эса АҚШ ва Саудия “оғир бадал тўлайди”, дея таҳдид қилган.

Ямандаги Эронга яқин ҳусийлар ҳаракати эса ўтган ҳафта Қизил денгиз орқали Саудия нефть экспортини блокада қилишини эълон қилиб, кемалар ва нефт объектларига ҳужумлар уюштирган.

Эслатиб ўтамиз, аввалроқ “The Wall Street Journal” манбаларига таяниб, Қувайт ва Баҳрайн Эрон ҳудудидаги объектларга яширин ҳаво зарбаларини бергани ҳақида ёзганди.