Украинани бўлишни таклиф қилганим йўқ – Келлогг

АҚШ Президентининг Украина бўйича махсус вакили Кит Келлогг Британиянинг “The Times” газетаси унинг сўзларини бузиб кўрсатганини ва у Украина ҳудудининг бўлинишини назарда тутмаганини айтди. Бу ҳақда Келлогг X ижтимоий тармоғидаги саҳифасида ёзди.

“Times” мақоласи менинг айтганларимни бузиб кўрсатди. Мен Украина суверенитетини қўллаб-қувватлаган ҳолда сулҳдан кейин барқарорликни таъминловчи кучлар ҳақида гапирдим. Мен бўлиниш ҳақида гапирганда, иттифоқчи кучларнинг жавобгарлик соҳаларини назарда тутган эдим (Америка қўшинлари бундан мустасно). Мен Украинани бўлмоқчи эмас эдим”, деб ёзади у.

Эслатиб ўтамиз, аввалроқ “The Times”, Келлоггнинг фикрича, Украина урушдан кейинги Берлин мисолида Европа давлатлари ва Россия ўртасида назорат зоналарига бўлиниши мумкинлиги ҳақида хабар берган эди. Келлоггнинг айтишича, Британия ва Франция қўшинлари янги жангларнинг олдини олиш учун “тўхтатувчи куч” сифатида ғарбий Украинани эгаллаб олиши мумкин, Россия армияси эса Украина шарқини назорат қилади. АҚШ Президенти Доналд Трампнинг махсус вакилига кўра, Украина кучлари Европа ва Россия қўшинлари ўртасида жойлашиши мумкин. Келлогг, шунингдек, ҳозирги фронт чизиғи бўйлаб 30 километрлик қуролсизлантирилган ҳудуд яратиш мумкинлигини ҳам таклиф қилди.