Украина Ozon омборига ва Самарадаги нефть заводига зарба берди

Украина Қуролли кучлари бугун, 15 сентябрга ўтар кечаси Таганрогга дронлар ва ракеталар билан ҳужум қилди. Бу ҳақда Ростов вилояти раҳбари Юрий Слюсарь маълум қилди.

Қайд этилишича, Ozon маркетплейси омборига, бир нечта турар жой биноларига, дўконлар ва маъмурий биноларга зарар етган. Губернатор маълумотларига кўра, одамлар жабрланмаган. Ozon компанияси Таганрогда ракета хавфи сабабли логистика ҳамкорининг етказиб бериш хаби эвакуация қилинганини маълум қилган. Компания ушбу хабда сотувчиларнинг товарлари “ҳеч қачон қабул қилинмагани ва у бошқа операцияларни бажаришини” билдирган.

Украинанинг “Exilenova+” мониторинг лойиҳаси маълумотларига кўра, зарбанинг нишонларидан бири ҳарбий самолётларни таъмирлаш ва модернизация қилиш билан шуғулланувчи Г. В. Бериев номидаги Таганрог авиация илмий-техника мажмуаси бўлган.

Украина дронлари, шунингдек, Самара вилоятига ҳам ҳужум қилган. Губернатор Вячеслав Федорищев тафсилотларга тўхталмай, саноат корхоналаридан бирига зарар етганини маълум қилган. “Astra” ва Украина мониторинг каналлари “Роснефть”га тегишли бўлган “Сызрань” нефтни қайта ишлаш заводига ҳужум қилинганини ёзмоқда.

Эслатиб ўтамиз, кеча, 14 сентябрь куни АҚШ Президенти Дональд Трамп Украина Россиянинг энергетика инфратузилмаси объектларига зарба бермасликка рози бўлганини ва Россия ҳам гўёки шундай қилишга розилик берганини маълум қилди. Украина Президенти Владимир Зеленский бундай келишувга тайёрлигини тасдиқлади, аммо Россия унга амал қилишига шубҳа билдирди. Кремлда Трампнинг Украинани Россия НҚИЗларига зарба беришни тўхтатишга қилган чақириғи мамнуният билан кутиб олинди. Бироқ Россия Президенти матбуот котиби Дмитрий Песков журналистларнинг Россиянинг ўзи зарбаларни тўхтатадими ёки йўқми, деган саволига жавоб бермади. “Financial Times” манбалари Трамп энергетика сулҳи ҳақида эълон қилишга “шошилганини” хабар қилди.