Уиткофф яна Путиннинг ҳузурига борди. Улар 3 соат нималарни муҳокама қилди?

Россия Президенти Владимир Путин бугун, 21 октябрь куни АҚШ Президентининг махсус элчиси Стив Уиткоффни қабул қилди. Украина можаросини ҳал қилишга қаратилган музокаралар уч соат давом этди. Бу ҳақда Россия раҳбарининг матбуот котиби Дмитрий Песковнинг сўзларига таяниб, ТАСС хабар берди.  

Учрашув Москва вақти билан тахминан соат 11:55 да бошланган ва қарийб уч соат давом этган. Суҳбат Санкт-Петербургдаги Константин саройида ташкил этилган.

Путин ва Уиткофф учрашув давомида Украинадаги можарони ҳал қилиш масалаларини муҳокама қилган. Россия раҳбари суҳбатдошига, шунингдек, АҚШ Президенти Дональд Трампга Украинадаги инқироз муаммоларига эътибор қаратаётгани учун миннатдорлик билдирган. Путин Уиткоффдан АҚШнинг биринчи хоними Мелания Трампга инсонпарварлик хусусиятига эга масалаларни ҳал қилишга қўшган ҳиссаси учун миннатдорлик сўзларини етказишини сўраган.

Бундан ташқари, Путин ва Трампнинг Хитойда бўлиши мумкин бўлган учрашувига оид айрим фикрлар ҳам муҳокама қилинган. Форс кўрфазидаги вазият ҳамда дизель ёқилғиси бўйича келишув масаласи кўриб чиқилган. Суҳбат давомида Россия Президенти томонидан АҚШ фуқароси Стивен Хаббардни озод қилиш тўғрисида қабул қилинган қарор ҳам эътибордан четда қолмаган.

Америкалик музокарачи Жаред Кушнер касаллиги сабабли Путин билан учрашувга келмаган. У Уиткофф Украина Президенти Владимир Зеленский билан музокаралар олиб борган куни Осло шаҳрида ҳам бўлмаган. Кушнер Путин билан учрашувга телефон орқали масофадан туриб қўшилган.

Россия томонидан учрашувда давлат раҳбарининг ёрдамчиси Юрий Ушаков ва Россия Президентининг хорижий давлатлар билан инвестициявий-иқтисодий ҳамкорлик бўйича махсус вакили Кирилл Дмитриев ҳам иштирок этган.

Эслатиб ўтамиз, жорий йилнинг сентябрь ойи бошида ҳам Владимир Путин Стив Уиткофф ва Жаред Кушнер билан музокара ўтказганди. Путиннинг америкалик музокарачилар билан учрашуви тахминан 3 соат давом этган.

Жасмина Муртазоева