Ўғлига ноодатий исм қўйган она қамалди

Норвегияда Кирсти Ларсен исмли аёл янги туғилган ўғлига “Гешер” деб исм қўймоқчи бўлгани учун қамоққа тушди. Бу ҳақда РИА Новости хабар берди.

Қайд этилишича, Ларсен 13-фарзандини дунёга келтиришидан аввал тушида бир овозни эшитган. Унда ўғлига инглиз тилидаги “Bridge” – “кўприк” деб исм қўйиш тавсия қилинган. Шундан сўнг у ушбу сўзнинг ибронийча варианти “Гешер”ни танлаган.

Мутасаддилар ушбу исм ғайриоддий экани, ўғил болаларга қўйиладиган исмлар орасида кенг тарқалмагани ва бошқа фамилияга ўхшашлигини таъкидлаган.

Норвегия қонунчилигига кўра, боланинг манфаатларига мос келмайдиган ёки унинг фаровонлигига салбий таъсир кўрсатиши мумкин бўлган исмларни қўйиш таъқиқланади.

Ларсен ва унинг турмуш ўртоғи қарор устидан шикоят қилган, бироқ суд ҳам уларнинг талабини қаноатлантирмаган. Кейинчалик болани белгиланган муддатда расмий исм билан рўйхатдан ўтказмагани учун оилага қарийб 1,6 минг норвег кронаси миқдорида жарима солинган. Бироқ Ларсен жаримани тўлашдан бош тортган.

“Агар жаримани тўласак, қандайдир айбни тан олган бўламиз”, деган у.

Аёлнинг даромади бўлмагани сабабли жарима ундирилмаган ва жазо икки кунлик қамоқ билан алмаштирилган. Шунга қарамай, у ўз қароридан қайтмаган ва ўғлининг исми “Гешер” бўлиб қолишини қатъий таъкидлаган.

Эслатиб ўтамиз, аввалроқ Муҳаммад исми 2025 йилда Англия ва Уэльсда туғилган ўғил болалар орасида энг оммабоп исмга айланиб, учинчи йил кетма-кет биринчи ўринни эгаллагани ҳақида хабар берилган эди.