UEFA президенти Александр Чеферин ЖЧ финалини бойкот қилди

UEFA президенти Александр Чеферин АҚШ терма жамоаси ҳужумчиси Фоларин Балогун билан боғлиқ баҳсли қарордан сўнг 2026 йилги Жаҳон чемпионати финалини бойкот қилди. Бу ҳақда “Irish Independent” нашрлари хабар берди.

Жаҳон чемпионати финали жорий йилнинг 19 июль куни АҚШнинг Нью-Жерси штати, Ист-Ратерфорд шаҳридаги “МетЛайф” стадионида Аргентина ва Испания терма жамоалари ўртасида бўлиб ўтди. Учрашув Испаниянинг 1:0 ҳисобидаги ғалабаси билан якунланди. 

Нашр маълумотига кўра, FIFA вице-президенти лавозимини ҳам эгаллаб турган Чеферин одатда финалда иштирок этиши керак эди. Бироқ у Фоларин Балогуннинг дисквалификацияси бекор қилинганидан норози бўлиб, ўйинга бормасликка қарор қилган.

Балогун Босния ва Герцеговинага қарши 1/16 финал баҳсида (2:0) тўғридан-тўғри қизил карточка олган ва Белгияга қарши кейинги учрашувни ўтказиб юбориши кутилган эди. Аммо FIFA Интизом қўмитаси унинг дисквалификациясини бекор қилиб, футболчига 40 минг АҚШ доллари миқдорида жарима тайинлади.

Хабарларга кўра, мазкур қарор АҚШ Президенти Дональд Трамп FIFA президенти Жанни Инфантинодан Балогуннинг жазосини қайта кўриб чиқишни шахсан сўрагани ва бу масала юзасидан FIFA раҳбарияти билан бир неча бор мулоқот қилганидан кейин қабул қилинган.

Натижада Балогун Белгияга қарши баҳснинг деярли тўлиқ қисмида майдонда ҳаракат қилди ва фақат 92-дақиқада алмаштирилди.

UEFA эса мазкур қарорни кескин танқид қилиб, уни “мисли кўрилмаган, тушунарсиз ва асоссиз” деб баҳолади ҳамда бу ҳолат “қизил чизиқдан ўтилгани”ни таъкидлади.

Шунингдек, Чеферин FIFA’нинг бошқа қарорларидан ҳам норозилигини билдирган. Жумладан, у Жаҳон чемпионати иштирокчилари сонининг 48 та жамоага кенгайтирилишини танқид қилиб, бу турнирда қизиқарсиз учрашувлар сони ортишига олиб келишини айтган.

Маълумотларга кўра, UEFA FIFA’нинг мусобақа давомида футбол қоидаларига киритган айрим ўзгаришларидан ҳам норози. Хусусан, ўйинларда сув ичиш учун танаффуслар сабаб баҳслар шартли равишда тўрт қисмга бўлиниб, телетрансляцияларда реклама намойиш этилишига имкон яратилгани, шунингдек, Жаҳон чемпионати финалидаги танаффус 27 дақиқа давом этиб, рухсат этилган 15 дақиқалик меъёрдан анча ошиб кетгани танқид қилинган.

Эслатиб ўтамиз, аввалроқ UEFA’га аъзо бир нечта миллий ассоциациялар бўлажак сайловларда амалдаги FIFA президенти Жанни Инфантинога қарши муносиб рақобатлаша оладиган ягона номзодни излаётгани ва Франциянинг ПСЖ клуби президенти Носир Ал-Хелайфийни FIFA’га янги раҳбар сифатида сайлашни муҳокама қилаётгани ҳақида хабар берилганди.