Учувчи наша чекиб, самолётни бошқарди (видео)

Пхукетдан Деҳлига учayotgan Air India самолёти парвоз вақтида қарийб 90 метрга кескин пастлаб, йўловчиларнинг жароҳатланишига сабаб бўлди. Ҳодисадан сўнг ўтказилган текширувда эса самолёт капитани наша истеъмол қилгани аниқланди. Бу ҳақда “The Independent” хабар берди.

Қайд этилишича, воқеа жорий йилнинг 4 август куни Пхукет – Деҳли йўналишида парвоз қилаётган самолётда юз берган. Самолёт крyиз баландлигида тўсатдан қарийб 300 фут, яъни 90 метрга пастлаган. Бунинг оқибатида камида 24 нафар йўловчи жароҳатланган, бироқ самолёт кейинчалик хавфсиз қўндирилган.

Ҳодисадан кейин самолёт учувчилари гиёҳванд моддалар бўйича текширувдан ўтказилган. Маълумотларга кўра, капитан топширган дастлабки тест қўшимча текширувни талаб қиладиган натижани кўрсатган. Кейинги тест эса унинг наша истеъмол қилганини тасдиқлаган.

Нашрнинг ёзишича, ҳозирда терговчилар капитан парвоз вақтида қандай ҳаракат қилганини ҳам ўрганмоқда. Борт экипажи аввалроқ унинг ўзини тўлиқ назорат қила олмаётгани ҳақида авиакомпанияга шикоят қилган.

Ҳисоботларга кўра, самолёт кескин пастлаган пайтда капитан ўз ўрнида бўлмаган. У иккинчи учувчининг ортида туриб, кондиционер тизими ҳақида гаплашаётган вақтда огоҳлантириш сигнали ишга тушиб, автопилот ўчган. Иккинчи учувчи самолёт бурнини пастга йўналтирган. Оқибатда самолёт кескин пастлаб, кабинадаги буюмлар ҳамда икки учувчи ўз ўриндиқларидан кўтарилиб кетган. Капитан ўз жойига қайтиб, бошқарувни қўлга олган ва самолётни барқарорлаштирган. Бироқ унгача самолёт қарийб 90 метрга пастлаб улгурган.

Терговчилар самолётдаги эҳтимолий техник носозликларни ҳам текширмоқда. Парвоз маълумотларида автопилотнинг узилиши, лифт билан боғлиқ носозлик ва гидравлик тизимларда босим пасайгани қайд этилган. Air India ҳодисага қисқа муддатли турбулентлик сабаб бўлганини билдирган. Ҳиндистон авиация вазирлиги эса якуний хулоса барча техник, тиббий ва бошқа далиллар ўрганилгач берилишини маълум қилган.

Эслатиб ўтамиз, аввалроқ Канадада йўловчи самолёти бортидаги бола хавфсизлик камарини тақишдан бош тортгани сабабли рейс бекор қилингани ҳақида хабар берилган эди.