Туск Орбанга таҳдид қилди

Европа Иттифоқига раислик қилувчи Польша Бош вазири Дональд Туск Венгрия Бош вазири Виктор Орбанни Россия Федерациясига қарши санкцияларни узайтиришга вето қўйса, бунинг оқибатлари билан таҳдид қилди. Бу ҳақда Польша вазири Х ижтимоий тармоғида ёзиб қолдирган.

Унинг ёзишича, агар Венгрия Бош вазири Европа санкцияларини тўсиб қўйса, Путин томонга ўйнаётган бўлади.

“Агар Орбан ҳақиқатан ҳам уруш учун муҳим дақиқаларда Европа санкцияларини тўсиб қўйса, у Европанинг хавфсизлиги ва келажаги учун бу катта ўйинда биз томонда эмас, балки Путиннинг жамоасида ўйнаётгани аниқ бўлади. Бу ҳақиқат”, деган Туск.

Кеча, 24 январь куни Венгрия вакиллари Европа Иттифоқининг Россияга қарши санкцияларини узайтириш қарорига рози бўлмагани ҳақида хабар берган эди. Россия Федерациясига қарши санкцияларни келгуси олти ойга узайтириш тўғрисидаги қарор 27 январь куни Европа Иттифоқи ташқи ишлар вазирлари йиғилишида қабул қилинади. 

Эслатиб ўтамиз, аввалроқ Польша Европа Иттифоқига раислигининг очилиш маросимида Венгрия элчиси Иштван Ийдярто иштирокини номақбул деб топганди. Польша Ташқи ишлар вазири Радослав Сикорский Венгрия элчихонасига нота юборган, унда Иштван Ийдяртонинг маросимда иштироки “мўлжалланмагани” таъкидланган.