Тўқаев Трамп ва Путиннинг суҳбатига муносабат билдирди

Қозоғистон Президенти Қосим-Жомарт Тўқаев Россия Президенти Владимир Путин ва АҚШ Президенти Дональд Трампнинг Украина бўйича телефон музокаралари натижаларини олқишлади. Бу ҳақда Қозоғистон Президентининг матбуот котиби Руслан Желдибай маълум қилди.

“Давлат раҳбари икки давлат етакчилари узоқ муддатли тинчликка эришиш йўлида аниқ келишувларга интилишларини намоён этганини таъкидлади. Унга кўра, бу ёндашув Евросиё хавфсизлигини таъминлаш учун ниҳоятда муҳимдир”, дейилади хабарда.

Билдирилишича, бунгача Қозоғистон Президенти барча иштирокчи давлатларни Украина бўйича музокаралар жараёнини бошлашга чақирган ҳамда BRICS саммитида Хитой ва Бразилиянинг тинчлик режасини қўллаб-қувватлаган.

Эслатиб ўтамиз, аввалроқ Владимир Путин ва Дональд Трамп ўртасида телефон орқали мулоқот бўлиб ўтганди. Мулоқотда Дональд Трамп томонлар ўртасида 30 кун давомида энергетика инфратузилмасига зарба беришдан воз кечиш таклифини илгари сурган. Владимир Путин бу ташаббусга ижобий муносабат билдирган ва Россия ҳарбийларига тегишли кўрсатмалар берган. Шунингдек, улар Яқин Шарқ минтақасини келажакдаги можароларнинг олдини олиш учун ҳамкорлик майдони сифатида муҳокама қилган ҳамда стратегик қуролларнинг тарқалишини тўхтатиш зарурлигини таъкидлаб, ушбу масалада кенг қамровли чоралар кўриш учун бошқа томонлар билан ҳамкорлик қилишга келишиб олган.