Тўқаев FIFA президентини қабул қилди

Қозоғистон Президенти Қосим-Жомарт Тўқаев Қозоғистонга биринчи марта расмий ташриф билан келган Халқаро футбол федерацияси (FIFA) раҳбари Жанни Инфантино билан учрашди. Бу ҳақда “Akorda” матбуот хизмати хабар берди.

Давлат раҳбари FIFA президенти билан Қозоғистон футболи салоҳиятини ва республикада ёшлар спортини ривожлантириш масалаларини муҳокама қилди. Шунингдек, у Жанни Инфантинони қайта FIFA президентлигига сайлангани билан табриклади ва федерация раҳбари сифатидаги фаолияти учун миннатдорлик билдирди. Тўқаев FIFA президентининг Қозоғистонга келиши спортни ривожлантириш нуқтаи назаридан жуда муҳим эканини таъкидлади.

“Дунёдаги энг оммабоп спорт тури бўлган футболни ривожлантириш учун кўп ишлар қилаётганингизни биламан. Биз сизнинг саъй-ҳаракатларингизни қадрлаймиз ва FIFA президенти сифатида сизни қўллаб-қувватлайман. Биз FIFA ва шахсан сиз билан яхши ҳамкорликни давом эттириш ниятидамиз”, дейди Қосим-Жомарт Тўқаев.

Тўқаев Инфантино билан учрашувда Қозоғистонда 1 миллиондан ортиқ киши тизимли равишда футбол билан шуғулланаётганини, 17 та футбол маркази ва 2 та академия фаолият юритаётганини, уларда 7 мингдан ортиқ бола миллионлар ўйини бтлан шуғулланаётганини эслатди.

Жанни Инфантино FIFA ўзининг муваффақиятли халқаро тажрибаси билан ўртоқлашишга ва қозоқ футболини ривожлантиришга ёрдам беришга ваъда берди.

“Бу менинг Қозоғистонда биринчи марта эмас, балки FIFA президенти сифатида биринчи марта келишим. Шунинг учун сиз билан учрашиш мен учун алоҳида шарафдир. Бу гўзал мамлакатнинг барча аҳолиси каби сиз ҳам футболни яхши кўришингизни биламан. Биз биргаликда ажойиб ишларни қила оламиз. Қозоғистон нафақат минтақавий миқёсда, балки жаҳон миқёсида жуда муҳим давлатга айланди. FIFA учун бу ажойиб ҳамкорлик. Биз биргаликда ишлашимиз керак, чунки футбол бу мамлакатда жамият интеграцияси, шунингдек, бошқа мамлакатлардан келган одамларни бирлаштириш учун катта имкониятлар яратади”, дейди Жанни Инфантино.