To‘qayev FIFA prezidentini qabul qildi

Qozog‘iston Prezidenti Qosim-Jomart To‘qayev Qozog‘istonga birinchi marta rasmiy tashrif bilan kelgan Xalqaro futbol federatsiyasi (FIFA) rahbari Janni Infantino bilan uchrashdi. Bu haqda “Akorda” matbuot xizmati xabar berdi.

Davlat rahbari FIFA prezidenti bilan Qozog‘iston futboli salohiyatini va respublikada yoshlar sportini rivojlantirish masalalarini muhokama qildi. Shuningdek, u Janni Infantinoni qayta FIFA prezidentligiga saylangani bilan tabrikladi va federatsiya rahbari sifatidagi faoliyati uchun minnatdorlik bildirdi. To‘qayev FIFA prezidentining Qozog‘istonga kelishi sportni rivojlantirish nuqtai nazaridan juda muhim ekanini ta’kidladi.

“Dunyodagi eng ommabop sport turi bo‘lgan futbolni rivojlantirish uchun ko‘p ishlar qilayotganingizni bilaman. Biz sizning sa’y-harakatlaringizni qadrlaymiz va FIFA prezidenti sifatida sizni qo‘llab-quvvatlayman. Biz FIFA va shaxsan siz bilan yaxshi hamkorlikni davom ettirish niyatidamiz”, deydi Qosim-Jomart To‘qayev.

To‘qayev Infantino bilan uchrashuvda Qozog‘istonda 1 milliondan ortiq kishi tizimli ravishda futbol bilan shug‘ullanayotganini, 17 ta futbol markazi va 2 ta akademiya faoliyat yuritayotganini, ularda 7 mingdan ortiq bola millionlar o‘yini btlan shug‘ullanayotganini eslatdi.

Janni Infantino FIFA o‘zining muvaffaqiyatli xalqaro tajribasi bilan o‘rtoqlashishga va qozoq futbolini rivojlantirishga yordam berishga va’da berdi.

“Bu mening Qozog‘istonda birinchi marta emas, balki FIFA prezidenti sifatida birinchi marta kelishim. Shuning uchun siz bilan uchrashish men uchun alohida sharafdir. Bu go‘zal mamlakatning barcha aholisi kabi siz ham futbolni yaxshi ko‘rishingizni bilaman. Biz birgalikda ajoyib ishlarni qila olamiz. Qozog‘iston nafaqat mintaqaviy miqyosda, balki jahon miqyosida juda muhim davlatga aylandi. FIFA uchun bu ajoyib hamkorlik. Biz birgalikda ishlashimiz kerak, chunki futbol bu mamlakatda jamiyat integratsiyasi, shuningdek, boshqa mamlakatlardan kelgan odamlarni birlashtirish uchun katta imkoniyatlar yaratadi”, deydi Janni Infantino.