Трампнинг янги матбуот котиби 5 кунда ишдан ҳайдалди

АҚШ Президенти Дональд Трампнинг янги матбуот котиби Кэти Закария лавозимга тайинланганидан атиги беш кун ўтиб ишдан кетди. Унинг фаолияти илк брифингдаги муваффақиятсиз чиқиши ва юридик малакаси билан боғлиқ саволлар ортдан якунланди. Бу ҳақда “The New York Times” хабар берди.

Закария жорий йилнинг 9 октябрь куни ушбу лавозимга таклиф қилинган, 12 октябрь куни эса иш бошлаган. Бунгача у “Fox News” телеканалида консерватив қарашлари билан танилган шарҳловчи бўлган. Бироқ Оқ уй матбуот котиби сифатидаги фаолияти узоққа чўзилмади.

Унинг 13 октябрь куни ўтказган биринчи ва охирги брифинги 14 дақиқа давом этган, шундан журналистларнинг саволларига тахминан беш дақиқа ажратилган. Закария олдиндан тайёрланган матнни ўқиб берган ва журналистларнинг атиги учта саволига жавоб қайтарган. Шунингдек, турмуш ўртоғи ҳақида гапираётиб, адашиб АҚШ Президенти Дональд Трампни назарда тутувчи иборани ишлатиб юборган. У тезда хатосини тузатган. Бу ҳолатлар унинг илк чиқиши юзасидан танқидлар кучайишига сабаб бўлди.

Шунингдек, Закариянинг юридик малакаси ҳам савол остида қолган. Трамп уни омма олдида “адвокат” деб таништирган бўлса-да, Закария АҚШда адвокатлик фаолияти билан шуғулланиш учун зарур бўлган имтиҳондан ўта олмагани маълум бўлган. Журналистлар ундан қайси штатда ушбу имтиҳондан ўтганини сўраганида, у саволни нотўғри тушунган. Кейинчалик “The New York Times” нашрига саволни нотўғри эшитганини билдирган. Унинг оммавий ахборот воситаларидаги кейинги чиқишлари ҳам танқидларга сабаб бўлган.

15 октябрь куни Трамп Оқ уй қароргоҳидан чиқиб кетаётиб, журналистларга Закарияга лавозимни қайта кўриб чиқишни тавсия қилганини айтган.

“Ростини айтсам, сизнинг ўрнингизда бўлганимда, бу қарорни қайта кўриб чиқардим. Кэти, сизга бу иш керакми? Менимча, керак эмас”, деган Президент.

Оқ уй коммуникациялар бўйича директори Стивен Чунг Закария кейинчалик эълон қилинадиган янги лавозимга ўтказилишини маълум қилган. Трамп ҳам унинг ўз маъмуриятида бошқа шаклда ишлашда давом этиши мумкинлигини айтган.

Закария ижтимоий тармоқдаги саҳифасида Трамп учун ишлаш шараф бўлганини ёзиб, Президентга миннатдорлик билдирган.

Нашрнинг қайд этишича, Закария Оқ уй матбуот котиби лавозимида атиги беш кун ва бир марта брифинг ўтказиб ишлаган. Бу лавозим тарихидаги энг қисқа фаолият муддатларидан бири бўлиши мумкин.