Макрон ва Рюттенинг Трампга ишончи қолмади – ОАВ

АҚШ Президенти Дональд Трампнинг Франция Президенти Эммануэль Макрон ва НАТО бош котиби Марк Рютте билан ёзишмаларини оммага эълон қилиши Европа сиёсатчиларида шок ҳолатини келтириб чиқарди ва Вашингтонга бўлган ишончни жиддий равишда сусайтирди. Бу ҳақда “Politico” нашри хабар берди. 

Қайд этилишича, Трамп Truth Social ижтимоий тармоғидаги саҳифасида Макрон ва Рюттедан келган хабарлар скриншотларини жойлаган. Ушбу ёзишмаларда Франция Президенти Россия иштирокида G7 учрашувини ўтказишни таклиф қилган, НАТО бош котиби Марк Рютте эса АҚШ Президентининг ташқи сиёсий йўналишини ижобий баҳолаган.

“Politico”нинг ёзишича, ушбу ёзишмалар эълон қилиниши Европа сиёсатчиларини Трампнинг Гренландия масаласида Европа давлатларига нисбатан қилган босим ва таҳдидларидан ҳам кўра кўпроқ ҳайратга солган. АҚШ Президенти кейинчалик Гренландия бўйича бу талабларидан воз кечган эди.

Нашр билан суҳбатда исми ошкор этилмаган европалик дипломат Трампнинг бу ҳаракатларини номақбул деб атаб, эндиликда етакчилар ўртасидаги мулоқот мессенжерлар орқали олиб борилишидан воз кечилишини таъкидлаган. Унинг айтишича, бундан буён раҳбарлар ўртасидаги барча ёзма мулоқотлар бюрократик тузилмалар орқали амалга оширилади.

Европа дипломатлари ва расмийлари ЕИ етакчилари билан Трамп ўртасидаги ишончнинг йўқолиши жиддий оқибатларга олиб келишидан хавотирланмоқда. Нашр манбаларидан бирининг таъкидлашича, Трампнинг Гренландия устидан куч билан назорат ўрнатиш ҳақидаги таҳдидлари НАТОни реанимацияга тушириб қўйган. 

Яна бир манба эса ишонч йўқолганидан кейин уни тиклаш деярли имконсиз эканини ва глобал сиёсий вазият “тубдан ўзгарганини” қайд этган.

Эслатиб ўтамиз, 20 январь куни Франция Президенти Эммануэль Макрон Давосда иқдисодий форумдаги чиқишида АҚШ Европани заифлаштириш ва бўйсундиришга уринаётганини айтганди.