Трампнинг одами Паҳлавий билан махфий учрашув ўтказди – ОАВ

АҚШ Президенти Дональд Трампнинг Яқин Шарқ бўйича махсус вакили Стив Уитткофф ўтган дам олиш кунлари (10-11 январь) Эрон сўнгги шоҳининг ўғли Ризо Паҳлавий билан яширин учрашув ўтказиб, Ислом Республикасини қамраб олган норозилик намойишларини муҳокама қилган. Бу ҳақда номи ошкор этилмаган америкалик амалдорга таяниб, “Axios” хабар берди.

Нашрнинг қайд этишича, Ризо Паҳлавий ўзини Эронда режим алмашган тақдирда эҳтимолий “ўтиш даври етакчиси” сифатида кўрсатмоқда. Сўнгги икки ҳафта давомида у АҚШ телеканалларида фаол чиқиш қилиб, Трампни вазиятга аралашишга ва норозиликларни қўллаб-қувватлашга чақириб келмоқда. Бироқ портал манбасига кўра, АҚШ Президенти маъмурияти айрим намойишларда иштирокчилар Паҳлавий номини шиор сифатида ҳайқира бошлаганидан ҳайратда қолган.

Трамп Эрондаги вазият ривожи ҳақида фикр билдирар экан, Паҳлавийни “яхши инсон” деб атаган, бироқ ҳозирча АҚШ Президенти мақомида у билан учрашишни ўринли деб ҳисобламаслигини айтган. 

Маълумот учун, Ризо Паҳлавий – Эроннинг сўнгги шоҳи Муҳаммад Ризо Паҳлавий ва малика Фараҳ Паҳлавийнинг тўнғич ўғли. 1967 йилда отасининг тож кийиш маросимида у расман Эрон валиаҳд шаҳзодаси, деб эълон қилинган. 1979 йилда Эронда инқилоб содир бўлган пайтда Паҳлавий 19 ёшда бўлган ва АҚШда ҳарбий учувчи мутахассислиги бўйича таҳсил олаётган эди.

Шундан буён Ризо Паҳлавий АҚШда яшаб келади. Унинг тарафдорлари Паҳлавийни Эрон мухолифатидаги дунёга энг таниқли, тинч ислоҳотлар тарафдори бўлган ягона шахс деб билади. Танқидчилар эса Эрон аҳолиси муҳожирликдан келган етакчига ишониши қийинлигини таъкидлайди.

Теҳронда норозилик намойишлари 28 декабрь куни бошланган ва тез орада бошқа шаҳарларни ҳам қамраб олган. Норозиликка кескин нархлар ошиши ва эрон риали курсининг АҚШ долларига нисбатан қулашига сабаб бўлган. ОАВга кўра, тартибсизликлар вақтида қарийб 12 минг киши ҳалок бўлган.

Эрон расмийлари норозилик намойишларига АҚШ ва Исроилни алоқадорликда айбламоқда. Эрон парламенти спикери Муҳаммад Боқир Қолибафнинг айтишича, ҳарбий ҳаракатлар бошланган тақдирда Исроил ҳудуди, шунингдек минтақадаги АҚШ базалари ва кемалари “қонуний нишонлар”га айланади.