Трампнинг Мадурога берган муддати тугади. Энди нима бўлади?

АҚШ Президенти Дональд Трамп жорий йилнинг 21 ноябрида Венесуэла Президенти Николас Мадурога телефон орқали мурожаат қилиб, ундан бир ҳафта муддат ичида ўз оиласи билан мамлакатни тарк этишни талаб қилган. Бу ҳақда кеча, 1 декабрь куни “Reuters” агентлиги хабар берди.

Нашрга кўра, икки етакчи ўртасидаги суҳбат 15 дақиқа давом этган ва Трамп Мадурога 28 ноябрга қадар Венесуэлани тарк этиш имконияти берилганини билдирган.

Мадуро суҳбатда агар унга ва оиласига “тўлиқ ҳуқуқий амнистия, шу жумладан, барча АҚШ санкциялари бекор қилиниши” таъминланса, мамлакатни тарк этишга тайёр эканини билдирган. Шунингдек, у Халқаро жиноий суддаги ишнинг тўхтатилишини ва 100 нафар венесуэлалик мансабдор шахсга қарши АҚШ санкцияларининг бекор қилинишини талаб қилган. Мадуро, қолаверса, янги сайловлар ўтказилгунча Венесуэлани вақтинчалик бошқариш учун вице-президент Делси Родригес тайинланиши кераклигини таъкидлаган. Трамп эса Мадуронинг кўпчилик талабларини рад этган.

Трамп 29 ноябрда Truth Social’да Венесуэла устидаги ва атрофидаги ҳаво ҳудуди “тўлиқ ёпиқ” бўлиши кераклигини эълон қилган, бироқ 30 ноябрда у бу баёнотини ҳарбий зарбани билдирувчи буйруқ сифатида қабул қилмасликни таъкидлаган.

АҚШ ҳукумати Венесуэлани гиёҳванд моддалар контрабандаси билан етарлича курашмаганликда айблаб келади. ОАВга кўра, Трампнинг кўрсатмаси билан Марказий разведка агентлиги (CIA) Венесуэлада махфий операцияларни бошлаган, АҚШ ҳарбийлари Кариб денгизи ва Тинч океанининг шарқий қисмига ўтказилган. Сўнгги ойларда АҚШ Лотин Америкасининг қирғоғида контрабанда қилувчи 20 дан ортиқ кемани йўқ қилган, 80 дан ортиқ одам ҳалок бўлган.

Мадуро эса Каракасдаги митингда Венесуэланинг халқ ва қуролли кучлари империя таҳдидларидан мамлакатни ҳимоя қилишга тайёрлигини таъкидлаган ва бу вақт давомида аҳолининг бирлашган ҳолда, ижтимоий ва суверен Венесуэлани ҳимоя қилишга тайёр бўлганини билдирган.

Эслатиб ўтамиз, аввалроқ CNN ўз манбаларига таяниб, Николас Мадуро АҚШ ва Венесуэла ўртасидаги илгариги норасмий музокаралар чоғида америкалик вакилларга 18 ойдан кейин истеъфога чиқиши мумкинлигини айтгани ҳақида ёзганди.