Мадуро қачон истеъфога чиқишини айтди

Венесуэла Президенти Николас Мадуро АҚШ ва Венесуэла ўртасидаги илгариги норасмий музокаралар чоғида америкалик вакилларга 18 ойдан кейин истеъфога чиқиши мумкинлигини айтган. Бу ҳақда CNN хабар берди.

Телеканал маълумотига кўра, айрим АҚШ расмийлари Мадуронинг истеъфоси вазиятни ҳал қилиши мумкин, деб ҳисоблаган. Бироқ Оқ уй фақат дарҳол истеъфо назарда тутилган режани қўллаб-қувватлашини маълум қилган.

Маъмуриятнинг бир неча вакиллари таъкидлашича, Мадуро ва унинг атрофидагилар Оқ уй билан бир неча канал орқали боғланган ҳамда икки мамлакат ўртасидаги муносабатлар қандай кўриниш олиши мумкинлигини муҳокама қилмоқда.

“The New York Times” маълумотига кўра, олдинроқ Мадуро ва Трамп ўртасида телефон орқали суҳбат бўлиб ўтган, унда томонлар АҚШда учрашув ўтказиш имконини муҳокама қилган, аммо келишувга эриша олмаган. Суҳбат АҚШ Давлат котиби Марко Рубио иштирокида ўтган.

Ноябрь ойида “Reuters” АҚШ расмийларига таяниб ёзишича, Вашингтон Венесуэла раҳбарини ағдариш вариантларини кўриб чиқмоқда. Бундан аввал “Financial Times” маълумотига кўра, Мадурони қўлга олиш Венесуэлага ҳужум қилишнинг учта эҳтимолий сценарийидан бири бўлган.

Бундан ташқари, “The New York Times” 19 ноябрь куни манбаларга таяниб хабар берганидек, Мадуро АҚШга 2–3 йиллик ўтиш даври мобайнида истеъфога чиқиш таклифини берган. У бу ғояни норасмий музокаралар чоғида билдирган. Бироқ Оқ уй бу таклифни ҳам рад этиб, дарҳол лавозимдан кетишни талаб қилган.

АҚШ Венесуэла раҳбари билан алоқаларга қарамай, Кариб ҳавзасида ҳарбий мавжудлигини кучайтиришда давом этмоқда. Трамп 2025 йил август бошларида Америка ҳарбийларига лотин америкалик наркокартелларга қарши куч ишлатишга рухсат берган. Аввало, Венесуэла картеллари назарда тутилган. Ёз охирига бориб, Венесуэла қирғоқлари яқинида АҚШ денгиз флоти десант кемалари гуруҳлари ва уч эсминецдан иборат флотилия жойлашган.

Эслатиб ўтамиз, аввалроқ АҚШ Президенти Дональд Трамп Венесуэла ва унга туташ ҳудудлар устидаги ҳаво маконини тўлиқ ёпилганини эълон қилганди.