Трампнинг 100 кунлик рейтинг натижаси сўнгги 80 йилдаги энг паст даражага тушди

north_east

Трамп билан 100 кун: сўнгги 80 йилдаги энг паст натижа

АҚШ Президенти Дональд Трампнинг давлат раҳбари лавозимига киришганининг 100 кунлигида уни маъқуллаш рейтинги сўнгги 80 йил ичидаги энг паст даражага тушди: америкаликларнинг 55 фоизи Оқ уй раҳбарининг фаолияти ҳақида салбий фикр билдирди, фақат 39 фоизи эса унинг ҳаракатларини қўллаб-қувватлади. Бу натижалар 27 апрель куни эълон қилинган бўлиб, 18–22 апрель кунлари Ipsos компанияси, ABC News телеканали ва “The Washington Post” газетаси томонидан АҚШнинг 2464 сайловчиси ўртасида ўтказилган қўшма сўровнома асосида эълон қилинди.

“The Washington Post” газетаси сўров натижаларини шундай шарҳлади: 

“Аксарият америкаликлар Президент давлат раҳбарининг ваколатларини кенгайтиришга, федерал хизматчиларни ишдан бўшатиш орқали федерал ишчи кучи ҳажмини қисқартиришга, федерал агентликларни ёпишга ва сиёсий рақибларга қарши чоралар кўришга ҳаракат қилиб, “ҳаддан ошяпти”, деб ҳисоблайди”.

Газета чоп этган АҚШ президентлари рўйхати акс этган жадвалда ҳам Трампнинг бугунги рейтинг натижаси энг паст кўрсаткич экани кўрсатилган. Жадвал изоҳида: “Трампнинг маъқуллаш рейтинги биринчи ёки иккинчи президентлик муддатининг 100-кунида ҳар қандай олдинги президентдан пастроқ”, дейилган.

Жумладан, сўровда қатнашганларнинг 67 фоизи республикачининг яқиндаги фонд бозори қулаши пайтидаги ҳаракатларидан норози эканини билдирган, 64 фоиз иштирокчи чет эл маҳсулотларига бож жорий этилишини қўллаб-қувватламаган, 61 фоиз эса АҚШнинг бошқа мамлакатлар билан олиб бораётган сиёсатига салбий муносабат билдирган.

72 фоиз респондентлар Трампнинг ҳаракатлари яқин орада рецессия (иқтисодий пасайиш) келтиради, деб ҳисоблайди. 40 фоиздан ортиқ иштирокчилар эса ўз шахсий молиявий аҳволининг ёмонлашганини айтди. 

Февраль ойида — Трамп кўплаб фармонларни имзолагандан сўнг — унинг фаолиятини америкаликларнинг 45 фоизи қўллаб-қувватлаган, 53 фоизи эса унинг ишини маъқулламаган эди. Биринчи президентлик муддатида 100 кунлик иш фаолияти натижасида Трампнинг маъқуллаш рейтинги ҳозиргидан 3 фоиз юқори бўлган эди.

Трамп эса сўров натижаларидан норози бўлди ва ўзининг Truth Social ижтимоий тармоғида қуйидагиларни ёзди: 

“Бизда эндиликда эркин ва адолатли матбуот йўқ. Бизда ёмон мақолалар ёзадиган ва сўров натижаларини оммавий равишда сохталаштирадиган матбуот бор. Улар мурувватсиз ва коррупциялашган. Ачинарли ҳолат!”

Шунингдек, Трамп ОАВни фақат салбий тарзда ёритишда айблади ва уларни “халқ душманлари” деб атади. 

“Улар ҳақиқатан ҳам халқнинг душманлари! Мен уларга омад тилайман, лекин Американи яна буюк қилиш учун курашишда давом этаман!” деган Оқ уй раҳбари.