Трамп ЖЧ тақдирлашида иштирок этади – ОАВ

Халқаро футбол  федерацияси (FIFA) АҚШ Президенти Дональд Трампга Жаҳон чемпионати кубогини ғолибларга топшириш имконини бермоқчи. Бу ҳақда “talkSPORT” нашри хабар берди. 

Манбага кўра, FIFA Трампга 2026 йилги Жаҳон чемпионати ғолибларига кубокни шахсан топшириш имконини бериши мумкин.

Амалдаги протоколга кўра, Жаҳон чемпионати кубоги аввал шоҳсупага қўйилади. Кейин эса, чемпион жамоа футболчиларидан бири уни кўтариб, бутун жамоа билан биргаликда ғалабани нишонлайди.

Хабар қилинишича, FIFA Трампнинг тақдирлаш маросимидан кейин майдонни тарк этиши ёки футболчилар билан биргаликда ғалабани нишонлаши борасидаги қарорни унинг ўзига ҳавола қилган.

Маросимда 2026 йилги Жаҳон чемпионати мезбонлари бўлган АҚШ, Канада ва Мексика расмийлари ҳам иштирок этиши кутилмоқда.

Эслатиб ўтамиз, 2025 йилда АҚШда янги форматдаги илк Клублар ўртасидаги жаҳон чемпионати ўтказилган эди. Ўша турнирда Англиянинг “Челси” клуби ғолиб чиққан ва финалдан сўнг Дональд Трамп кубокни жамоага топширган. Шунингдек, у футболчилар билан бирга саҳнада қолиб, ғалабани нишонлаш маросимида ҳам иштирок этган.

Маълумот учун, АҚШ, Канада ва Мексика мезбонлик қилаётган 2026 йилги Жаҳон чемпионатининг финал баҳси 19 июль куни Нью-Йорк шаҳрида бўлиб ўтади.