Трамп “жаннатга кириш” учун тарафдорларидан пул сўради

АҚШ Президенти Дональд Трамп ўз тарафдорларига электрон почта орқали “жаннатга бориши” учун 15 доллар хайрия қилишни сўради. Бу ҳақда “Metro” газетаси ёзди.

“Мен жаннатга киришга ҳаракат қилмоқчиман”, деб ёзган Оқ уй раҳбари.

Трамп ўтган йили ўлдирилишига бир бахя қолгани ва “ўқ унинг терисини тешиб ўтганини” эслаган. Унинг сўзларига кўра, унинг Оқ уйга “ғалабали” қайтиши ҳеч қачон бўлмаслиги керак эди. Бироқ, у Худо уни “Американи яна буюк қилиш” учун қутқарганига ишонишини таъкидлаган.

Трамп ўз мурожаатида тарафдорлари доимо, жумладан, президентлик сайловларида ҳам, суд жараёнларида ҳам, суиқасд пайтида ҳам у билан бирга бўлганини таъкидлади.

“Энди дунёга биз ҳеч қачон ортга чекинмаслигимизни ва бу мамлакатни қутқариш учун курашда таслим бўлмаслигимизни кўрсатиш вақти келди. Шунинг учун мен 24 соатлик маблағ йиғишни бошладим ва бу саъй-ҳаракатларни ҳисобга олиш учун барчадан 15 доллар хайрия қилишни сўрайман”, деган у.

Эслатиб ўтамиз, аввалроқ ижтимоий тармоқларда АҚШнинг ҳукумат идораларида, шунингдек Оқ уйда мамлакат байроғи ярмигача туширилгани акс этган суратлар тарқалганди. Бу суратлар айниқса Қўшма Штатлар Президенти Дональд Трампнинг “вафот этгани” ҳақидаги миш-мишлар тарқалган бир пайтда кўп тарқала бошлади. Бу эса унинг “ўлими” борасидаги гапларни янада кучайтирди. Аммо Трамп тирик, унинг соғлиги жойида. Буни исмини ошкор этмаган АҚШ расмийси “Axios” нашри журналисти Барак Равидга маълум қилган.

Яқинда Трамп соғлиғи билан боғлиқ муаммоларга дуч келганди. Июль ойида Оқ уй унинг оёқлари шишишига олиб келадиган сурункали веноз етишмовчилик, деб номланувчи қон-томир касаллиги борлигини тасдиқлади. Вазият томирлардаги босимнинг ошишига олиб келади ва шиш пайдо бўлишига, шунингдек, ошқозон ярасига олиб келиши мумкин, аммо бу ҳаёт учун хавфли эмас деб баҳоланган. Трампнинг аҳволи расмий каналлар орқали эълон қилинишидан аввал ижтимоий тармоқларда тарқатилган суратларда унинг оёқлари шишиб кетгани кўриниб, соғлиғи ҳақида тахминлар пайдо бўлганди.

“The Daily Beast”нинг ёзишича, АҚШ Президенти Дональд Трампнинг қўлида кўкаришлар пайдо бўлган ва Оқ уй раҳбари бунинг ортидан қўлига крем суркаб олган. 79 ёшли давлат раҳбари яна ўз лавозимига киришганидан бери у бир неча бор ўнг қўлидаги кўкаришларни косметика воситаси билан яширишга мажбур бўлмоқда.