Трамп Жаҳон чемпионати финалига боради

АҚШ Президенти Дональд Трамп Нью-Йоркда Халқаро футбол федерацияси (FIFA) шарафига уюштириладиган қабул маросимида иштирок этади ва Жаҳон чемпионати финалига ташриф буюради. Бу ҳақда Оқ уй матбуот котиби Каролин Ливитт маълум қилди.

“Бугун АҚШ Президенти Манҳэттендаги “Trump Tower”да бўлиб ўтадиган FIFA қабул маросимида иштирок этиш учун Нью-Йоркка боради. Шундан сўнг, 19 июль куни Испания ва Аргентина ўртасидаги Жаҳон чемпионати финалини стадиондан кузатади”, дейди Ливитт журналистлар учун ўтказилган навбатдаги брифингда.

2026 йилги Жаҳон чемпионатининг финалида амалдаги жаҳон чемпиони Аргентина терма жамоаси Европа чемпиони Испанияга қарши майдонга тушади. Учрашув АҚШнинг Нью-Жерси штатидаги “МетЛайф” стадионида бўлиб ўтади.

Маълумотларга кўра, Дональд Трамп финалдан сўнг ғолиб жамоага Жаҳон чемпионати кубогини топширади.

Эслатиб ўтамиз, аввалроқ Жаҳон чемпионатининг финалини словениялик тажрибали ҳакам Славко Винчич бошқариши ҳақида хабар берилганди.