ЖЧ финалини бошқарадиган ҳакам кимлиги маълум бўлди

Аргентина ва Испания ўртасида бўлиб ўтадиган 2026 йилги Жаҳон чемпионати финалига хизмат қиладиган ҳакамлар бригадасини эълон қилди. Бу ҳақда расмий маълумотни FIFA саҳифасида эълон қилинди.

Финални словениялик тажрибали ҳакам Славко Винчич бошқаради. Унга қанотларда ҳамюртлари Томаж Кланчник ва Андраж Ковачич ёрдам беради. Тўртинчи ҳакам вазифасини БАА вакили Адҳам Маҳадмеҳ бажаради. Захира ёрдамчи ҳакам этиб эса Муҳаммад Алкалаф тайинланган.

46 ёшли Винчич турнир давомида учта учрашувда ишлади. У Бразилия – Марокаш (1:1), Жазоир – Иордания (2:1) гуруҳ босқичи ҳамда Мексика – Эквадор (2:0) 1/16 финал баҳсларини бошқарди. У Европанинг энг тажрибали ва нуфузли ҳакамларидан бири саналади. Шунга қарамай, айнан унинг финалга тайинланиши кўпчилик учун кутилмаган қарор бўлди.

Аввалроқ кўпчилик мутахассислар финални поляк ҳаками Шимон Марчиняк бошқаришини тахмин қилаётганди. Бироқ у плей-офф босқичида бирорта ҳам учрашувга тайинланмади. Айрим нашрлар бу ҳолатни унинг Аргентина – Жазоир учрашувида Лионель Мессига сариқ карточка кўрсатмагани билан боғлиқ баҳслар таъсир қилган бўлиши мумкинлиги билан изоҳламоқда.

Славко Винчич номи Аргентина мухлисларига яхши таниш. У шу пайтгача “альбиселесте” иштирокидаги фақат битта учрашувни бошқарган. Бу 2022 йилги Жаҳон чемпионатининг илк туридаги Саудия Арабистонига қарши баҳс бўлиб, Лионель Месси гол урганига қарамай, Аргентина 1:2 ҳисобида мағлуб бўлган эди. Ўша учрашув турнирнинг энг катта сенсацияларидан бири сифатида тарихда қолган.

Қизиғи шундаки, ўша омадсиз стартга қарамасдан, Аргентина мусобақа давомида ўзини тиклаб, турнир якунида жаҳон чемпионига айланган эди. Энди эса тўрт йил ўтиб, Славко Винчич яна Аргентина иштирокидаги ҳал қилувчи баҳсни бошқаради.