Трамп Зеленскийнинг ҳаракатларини мақтади

АҚШ Президенти Дональд Трамп Россия ва Украина ўртасидаги урушда Украина Президенти Владимир Зеленскийнинг ҳаракатларига ижобий баҳо берди. Бу ҳақда у kecha, 24 июнь куни Оқ уйда НАТО Бош котиби Марк Рютте иштирокида ўтказилган матбуот анжуманида маълум қилди.

Трамп журналистлар билан мулоқот чоғида, урушда ҳар икки томондан кўплаб одамлар ҳалок бўлаётганини қайд этган.

“Ҳар ҳолда у бардош беряпти. Ҳар икки томондан кўп одамлар ҳалок бўлмоқда, аммо менимча, унинг ишлари анча яхши кетмоқда”, деган Трамп.

Трамп бу фикрни журналистнинг “Сиз Зеленский ҳозир ғалаба қозоняпти деб ҳисоблайсизми?” деган саволига жавоб тариқасида билдирган.

Маълумот учун, Трамп аввалроқ бир неча бор Зеленскийни танқид қилган ва уни можарони тинч йўл билан ҳал қилишга қаратилган саъй-ҳаракатларга тўсқинлик қилишда айблаган эди.

Шунингдек, матбуот анжумани давомида Трамп Германия ва бошқа Европа давлатларини АҚШ ҳамда Исроилнинг Эронга қарши сиёсати бўйича етарлича қўллаб-қувватламаётгани учун танқид қилган.

Унинг айтишича, Вашингтон Германия ҳукуматидан “ҳеч бўлмаса кичик бир миннатдорлик ифодасини” кутган, аммо бундай муносабатни кўрмаган. Трамп АҚШ Германия ва Европанинг бошқа мамлакатларида ҳарбий контингент сақлаш учун юзлаб миллион доллар сарфлаётганини ҳам таъкидлаган.

Аввалроқ, Трамп “Катта еттилик” (G7) саммити доирасида Украина Президенти Владимир Зеленский билан учрашган эди. Ушбу учрашувдан кейин у Россия Украина билан тинчлик келишувига эришиши кераклигини айтган.

“Мен бунинг учун қўлимдан келган барча ишни қиламан”, деган Трамп.

24 июнь куни Украина Президенти Владимир Зеленский ҳам халққа мурожаатида, агар Киев G7 доирасида муҳокама қилинган ёрдамни олса, Россияни тинчликни танлашга мажбур қиладиган шароитларни тезда ярата олишини айтган. Аммо у бунинг учун қандай чоралар кўрилишини аниқлаштирмаган.