Трамп ва Си Цзиньпин қачон учрашиши маълум бўлди

АҚШ Президенти Дональд Трамп 30 октябрь куни Жанубий Кореянинг Пусан шаҳрида Хитой Раиси Си Цзиньпин билан учрашади. Бу ҳақда Трампнинг матбуот котиби Кэролайн Ливитт маълум қилди.

Ливиттнинг сўзларига кўра, Трамп 24 октябрь куни Малайзияга жўнайди ва маҳаллий вақт билан 26 октябрь куни эрталаб етиб боради. У мамлакат Бош вазири Анвар Иброҳим билан учрашади ва ASEAN етакчиларининг ишчи кечки овқатида иштирок этади. 

27 октябрь куни Трамп Токиога боради ва у ерда 28 октябрь куни Япониянинг янги Бош вазири Санаэ Такаити билан учрашади. 29 октябрь куни Трамп Пусанга учиб кетади ва у ерда Жанубий Корея Президенти Ли Чжэ Мён билан музокаралар ўтказади. Шунингдек, Оқ уй раҳбари Осиё-Тинч океани иқтисодий ҳамкорлиги (APEC) саммитида нутқ сўзлайди. 

“Маҳаллий вақт билан 30 октябрь куни Президент Вашингтонга қайтишдан олдин Хитой Раиси Си Цзиньпин билан икки томонлама учрашувда иштирок этади”, деган Ливитт. 

Маълумот учун, APEC 1989 йилда ташкил этилган бўлиб, 21 та мамлакат иқтисодиётини бирлаштиради. У халқаро ташкилот мақомига эга бўлмаса-да, минтақада савдо ҳамкорлигини ривожлантириш учун муҳим майдон ҳисобланади. 2025 йилда саммитга раислик қилиш ҳуқуқи Жанубий Кореяга ўтган.

Қайд этиш жоиз, Трампнинг Оқ уйга қайтишидан сўнг, 2025 йилнинг баҳорида АҚШ-Хитой муносабатлари кескин совуқлашиб кетди. Вашингтон Хитой маҳсулотларига божларни кескин оширди, Пекин ҳам худди шундай жавоб берди. Май-июнь ойларида Женева ва Лондонда бир неча раундлик музокаралар бўлиб ўтди ва томонлар 90 кунга божларни камайтиришга келишиб, вақтинчалик сулҳга эришди. Аммо кейинчалик музокаралар яна боши берк кўчага кириб қолди ва томонлар бир-бирини шартларни бузишда айблади.

Август ойида Хитой АҚШни “совуқ уруш менталитетида” айблади ва Вашингтон босими фонида ўз манфаатларини ҳимоя қилишга тайёр эканини билдирди. АҚШ Молия вазири Скотт Бессант эса сулҳ бўйича жараён секинлашганини қайд этди ҳамда янги келишув учун икки давлат раҳбарларининг бевосита иштироки зарурлигини айтди.

Эслатиб ўтамиз, Трамп жорий йилнинг 1 ноябридан Америка Қўшма Штатлари Хитойга нисбатан қўшимча 100 фоизлик бож тўлови жорий этиши ҳақида маълум қилганди. Трампнинг сўзларига кўра, бу чора Хитой томонидан 1 ноябрдан бошлаб деярли барча ишлаб чиқарилган маҳсулотларга нисбатан жорий этилиши режалаштирилаётган экспорт чекловларига жавоб бўлади. Икки мамлакат раҳбарининг учрашувлари бу чоралар жорий этилишидан олдин бўлиб ўтишини ҳисобга олсак, мулоқот ижобий ўтган тақдирда, божлар ҳам ўз-ўзидан бекор қилиниши мумкин.